मराठीमध्ये ‘बॉईज’ चित्रपटाच्या तीन भागांना प्रेक्षकांचा भरभरुन प्रतिसाद मिळाला. चित्रपटाच्या तिन्ही भागांनी प्रेक्षकांचं मनोरंजन केलं. आता ‘बॉईज ४’ प्रदर्शनाच्या मार्गावर आहे. या चित्रपटामध्ये गौरव मोरे, निखिल बने, पार्थ भालेराव, सुमंत शिंदे अशा कलाकारांची फौज पाहायला मिळणार आहे. चित्रपटाचा ट्रेलर, गाणी पाहिल्यानंतर प्रेक्षक ‘बॉईज ४’ची आतुरतेने वाट पाहत आहेत. पण या चित्रपटामध्ये ओंकार भोजने दिसणार नसल्यामुळे प्रेक्षक नाराज झाले आहेत. (Onkar Bhojane Health Issue)
ओंकार ‘बॉईज ४’मध्ये दिसणार असल्याची चर्चा होती. मात्र ट्रेलर, टीझर प्रदर्शित झाल्यानंतर ओंकार कुठेच दिसला नाही. याबाबत प्रेक्षकांनी नाराजी व्यक्त केली. पण तो या चित्रपटामध्ये का नाही? याबाबत खरं कारण आता समोर आलं आहे. चित्रपटाचे दिग्दर्शक विशाल देवरुखकर यांनी ओंकार चित्रपटामध्ये का नाही? याबाबत खुलासा केला आहे.
नुकत्याच दिलेल्या एका मुलाखतीत ओंकारबाबत विशाल यांना विचारण्यात आलं. याबाबत ते म्हणाले, “ओंकार आता चित्रपटामध्ये आमच्या बरोबर नाही. आम्ही चित्रपटाचं चित्रीकरण करण्याचा प्रयत्न केला तेव्हा ओंकारला शारिरीक बराच त्रास होता. ही गोष्ट बहुतेक कोणालाच ठाऊक नाही. त्याला डोळ्याचा खूप मोठा त्रास झाला होता. त्याची नस कुठेतरी त्रासदायक ठरत होती. दरम्यान त्याला पूर्ण बेडरेस्ट सांगितली होती. ‘बॉईज ४’साठी आम्ही ओंकारशी खूप चर्चा केली. पण त्याने स्वतःहून सांगितलं की, तुर्तास या चित्रपटासाठी मी थांबतो”.
आणखी वाचा – “मला नाकारतात कारण…”, कामासाठी वणवण फिरतोय बॉलिवूडचा सुप्रसिद्ध अभिनेता, म्हणाला, “ऑडिशनसाठी जातो मात्र…”
“पुढच्या चित्रपटामध्ये मी तुमच्याबरोबर काम करेन. आता माझ्याकडून काम होणार नाही. मी स्वतःहून त्याची हालत पाहिली आहे. तो खूप आजारी असता. त्यादरम्यान त्याच्या हाती इतरंही काम होतं. आम्ही समजूतीने हा निर्णय घेतला. ओंकारनेही स्वतःहून चित्रपटात काम न करण्याचा निर्णय घेतला. प्रेक्षक याबाबत नाराज आहेत यासाठी मी दिलगीरी व्यक्त करतो. पण तो अजूनही ‘बॉईज’च्या कुटुंबाचा भाग आहे. यापुढे भविष्यात तो ‘बॉईज’मध्ये असेल. त्याच्या तब्येतीने त्याला साथ दिली नाही. पण नक्कीच तो नव्या जोमाने काम करेल”. ओंकारने आता नव्या जोमाने काम करण्यास सुरुवात केली आहे.