abhijeet kelkar farming video : कोकण म्हणजे स्वर्ग. आणि हो आता पावसाळ्यात या स्वर्गाचा आनंद लुटण्यासारखं सुख नाही. निळाशार समुद्र. हिरवळ, साधी भोळी माणसं या सगळ्याने समस्त कोकण सजलेलं आहे. पावसाळा सुरु झाला की प्रत्येकाला कोकणात, शेतीसाठी गावाकडे जायची ओढ ही लागून राहते. अनेकजण याचा आनंद घेण्यासाठी कोकणाची वाटही धरतात. अशातच आता एक मराठमोळा अभिनेताही कोकणात शेती करताना दिसतोय. शेतीत तो व्यस्त असल्याचं दिसत आहे. थेट कोकणातून त्याने शेतात राबतानाचा व्हिडीओ, फोटो इंस्टाग्राम अकाउंटवर शेअर केला आहे. हा अभिनेता म्हणजे अभिजीत केळकर. ‘बिग बॉस’ फेम अभिनेता सध्या कोकणात त्याचा अमूल्य वेळ घालवताना दिसत आहे.
अभिजीत केळकरने त्याच्या इंस्टाग्राम अकाउंटवर शेतीकामाचा व्हिडीओ शेअर केला आहे. यामध्ये तो शेतात नांगरणी करताना दिसत आहे. शिवाय शेतात बसून तो जेवणाचा आनंद घेतानाही दिसत आहे. “कोकणात जन्म घ्यायला आणि यायला नशीब असावं लागतं”, असं कॅप्शन देत त्याने हा व्हिडीओ, फोटो पोस्ट केला आहे. यावर नेटकऱ्यांनी अभिजीतला ट्रोल केलं आहे. “भात लावण्याची ही कोणती पद्धत?”, असा सवाल अभिजीतच्या पोस्टवर नेटकऱ्याकडून करण्यात आला आहे.
यावर शांत न बसता अभिजीतने उत्तर देतं म्हटलं नेटकऱ्यांना सुनावलं आहे. “अशी इंस्टाग्रामवर बसून, नुसतं वाईट कमेंट्स करुन ती नाहीच कळणार, इंस्टाग्रामवर चिखल करण्यापेक्षा या खऱ्या चिखलात उतरुन बघ, लगेच कळेल”, असं म्हणत अभिजीतने पोस्टवर कमेंट करणाऱ्याला उत्तर दिलं आहे. तर एक महिला नेटकऱ्याने कमेंट करत, “तेल लावत गेला तुझा कोकण. आमच्या भागात येऊन बघ राजांचे किल्ल्लेच किल्ले आहेत”, असं म्हटलं आहे. यावरही अभिजीतने कमेंट करत, “चांगलच आहे की मग ताई, त्याचा अभिमान बाळगा, मलाही त्याचा अभिमानच आहे, महाराज माझेही आहेतच की, तुम्हाला अशी भाषा शोभत नाही पण विचार करुन बघा ताई. देव तुम्हाला लवकर बरं करो”, अशा मोजक्या शब्दात चांगलीच चपराक दिली आहे.
तर काहींनी अभिजीतला शेतात काम करताना पाहून त्याचं भरभरुन कौतुक केलं आहे. “मातीशी नाळ जोडलेली म्हणतात ना ते हेच. अभिनयात उंची असलेला आणि जमिनीवर पाय असेलेला अभिनेता”, “बरोबर आहे सर,कोकण म्हणजे स्वर्ग”, “अभिमान वाटतो की माणूस किती मोठा झाला तरी आपल्या गावाला विसरला नाही. दादा मी बघितलं दरवर्षी तुम्ही येता माहिती आहे. मी तुमचे व्हिडीओ पहिले आहेत”, “खरंच आहे कोकणात जन्म घ्यायला नशीबच लागतं”, असं म्हणत अनेकांनी अभिजीतचं कौतुक केलं आहे.
