आज सकाळपासून महाराष्ट्रातील लोकसभा निवडणूकच्या शेवटच्या टप्प्यातील मतदानाला सुरुवात झाली आहे. नागरीक सकाळपासूनच आपला हक्क बजावण्यासाठी घराबाहेर पडले आहेत. महाराष्ट्रातील काही महत्त्वाच्या मतदारसंघामध्ये मतदान होत आहे. मुंबईच्या सहा जागांसह राज्यातील एकूण १३ मतदारसंघात आज मतदान होत आहे. तर यांत कलाकार मंडळींचाही सहभाग आहे. अनेक सेलिब्रिटी कलाकार मंडळींनी मतदानाचा हक्क बजावलेला पाहायला मिळत आहे. दरम्यान अभिनेते आदेश बांदेकर यांनी निवडणूक व्यवस्थेवर नाराजी व्यक्त करत शेअर केलेल्या एका व्हिडीओने साऱ्यांचं लक्ष वेधलं आहे. (Aadesh Bandekar Angry On Voting System)
आदेश बांदेकर यांनी मतदान केंद्रातील एक व्हिडीओ शेअर करत त्याठिकाणी झालेला गोंधळ दाखवत म्हटलं की, “मी आता पवई केंदात आहे. हिरानंदानीसारखा सुशिक्षित असा हा भाग आहे. आणि याठिकाणी सगळ्यांची अशी प्रतिक्रिया पहिली तर ५७,५८ ही यादी बंद झाली आहे. सगळ्या मशिनी बंद झाल्या आहेत. हिरानंदानी फाऊंडेशन शाळेजवळील बराच मशिनी बंद झाल्या आहेत. सकाळपासून अनेक मतदार इथे उभे आहेत. अनेक लोक परतून गेली आहेत. वयस्कर मंडळी तीन-तीन तास रांगेत उभे आहेत”.
आणखी वाचा – मतदानासाठी सिनेसृष्टीही सरसावली, कलाकारांमध्ये मतदानाचा उत्साह, फोटो केले शेअर
या व्हिडीओमध्ये नागरिक त्रस्त असलेले पाहायला मिळत आहेत. अडीच-तीन तास रांगेत उभे असल्याचं नागरिक सांगत आहेत. “मतदान करणं हे आवश्यक आहे, म्हणून इथे उभे आहोत, पण इतके तास उभं राहणं फार कठीण आहे”, असं बोलत आहेत. शिवाय मशिनी बंद आहेत आणि अजून यावर कोणीही काहीही येऊन सांगत नसल्याचंही नागरिक बोलत आहेत. झोनल ऑफिसर अश्विनी यांनीही अद्याप कोणतीही अधिकृत माहिती दिलेली नाही.
या व्हिडीओमध्ये वयस्कर नागरिक, तसेच इतरही नागरिक त्रस्त असून मतदानाचा हक्क बजावण्यासाठी तीन-चार तास रांगेत उभे असल्याचं पाहायला मिळत आहे. आदेश बांदेकर यांनी शेअर केलेल्या या व्हिडीओमध्ये ऐनवेळी मतदानाच्या बूथवर झालेला गोंधळ पाहायला मिळत आहे. निवडणूक व्यवस्थेवर नाराजी व्यक्त करत समस्त नागरिकांच्या बाजूने आपले मत ते या व्हिडीओतून मांडताना दिसत आहेत.
