प्रसिद्ध यूट्यूबर आणि ‘बिग बॉस’ विजेता एल्विश यादवविरोधात रेव्ह पार्ट्यांचं आयोजन केल्याप्रकरणी गुन्हा दाखल करण्यात आला आहे. पोलिस एफआयआरनुसार, एल्विश यादव नोएडामध्ये रेव्ह पार्ट्या आयोजित करत असे. तसेच या पार्टीत बंदी असलेले साप आणि परदेशी मुलींनाही प्रवेश मिळाल्याचं समोर आलं. या प्रकरणावरून एल्विशसह आणखी पाच जणांवर गुन्हा दाखल करण्यात आला आहे. यावर एल्विश यादवने ही एक व्हिडीओ शेअर करत या प्रकरणात त्याचा हात नाही असं सांगितलं. (Pardeep Kharera On Elvish Yadav)
या प्रकरणात जसं एल्विश यादवचं नाव घेण्यात आलं तसेच आता या प्रकरणात मराठी अभिनेत्री मानसी नाईक हिचा पूर्वाश्रमीचा पती प्रदीप खरेरा याचाही संबंध असल्याचं बोललं जात आहे. एल्विशच्या सगळ्या व्हायरल व्हिडीओमध्ये प्रदीप दिसत असल्याने या चर्चांना उधाण आलं आहे. त्यामुळे “तू सुद्धा या प्रकरणात सामील आहेस का?” असे अनेक प्रश्न नेटकरी करताना दिसत आहेत. यावर आता प्रदीपने व्हिडीओ शेअर करत स्पष्टीकरण दिलं आहे.
प्रदीपने व्हिडीओ शेअर करत म्हटलं की, “नमस्कार मित्रांनो! एल्विशबद्दल सध्या ज्या बातम्या व्हायरल होत आहेत त्या सगळ्या खोट्या आहेत. मी तुम्हा सर्वांना विनंती करतो की, कृपया या खोट्या बातम्यांवर विश्वास ठेऊ नका. खोट्या प्रकरणात एल्विशचं नाव पुढे करण्याचा काहीजण प्रयत्न करत आहेत. आमच्या दोघांचे एकत्र व्हिडीओ पाहून अनेकांनी मला व माझ्या कुटुंबीयांना फोन करून याबद्दल चौकशी केली. पण, मी हेच सांगेन की, आम्हाला चुकीच्या पद्धतीने यात अडकवण्यात येत आहे.”
पुढे तो असंही म्हणाला आहे की, “माझा या प्रकरणाशी काहीच संबंध नाही. काही गोष्टी नकारात्मकतेने पसरवल्या जात आहेत. आम्ही सगळी मुलं एका गाण्याच्या शूटिंगसाठी जमलो असतानाचे हे सगळे व्हिडीओ आहेत. हा व्हायरल व्हिडीओ गाण्याचा एक भाग होता. हे गाणं आम्ही सहा महिन्यांपूर्वी शूट केलं होतं. आम्ही सापांची तस्करी वगैरे केलेली नाही.” असं स्पष्टीकरण देत प्रदीप खरेराने काही व्हायरल व्हिडीओदेखील शेअर केले आहेत.