R Subbalakshmi Passed Away : मल्याळम अभिनेत्री व संगीतकार आर. सुब्बलक्ष्मी यांनी गुरुवारी वयाच्या ८७ व्या वर्षी अखेरचा श्वास घेतला. त्यांच्या निधनाच्या बातमीने दाक्षिणात्य सिनेसृष्टीवर शोककळा पसरली आहे. काही दिवसांपूर्वी त्यांची प्रकृती खालावल्याने त्यांना रुग्णालयात दाखल करण्यात आले होते. एक गायिका व संगीतकार असलेल्या या अभिनेत्रीने ‘नंदनम’ फेम पृथ्वीराजसह चित्रपटांमध्ये प्रवेश केला. ‘कल्याणरामन’, ‘रप्पाकल’, ‘थिलककम’, ‘सीआयडी मूसा’, ‘पंडीप्पाडा’, ‘राणी पद्मिनी’ व इतर अनेक हिट चित्रपटांमुळे त्या प्रसिद्धीच्या झोतात आल्या.
अनेक चित्रपटांमध्ये आजीची महत्त्वपूर्ण भूमिका साकारणाऱ्या या अभिनेत्रीने अनेक तामिळ, तेलुगू चित्रपटांमध्ये काम केले. गौतम मेननच्या ‘विनयतांडी वरुवाया’मधील त्यांच्या भूमिकेसाठी तसेच ‘अम्मानी’ मधील मुख्य भूमिकेसाठी त्या विशेष चर्चेत होत्या. विजय स्टारर ‘बीस्ट’ या तामिळ चित्रपटातही त्या महत्त्वपूर्ण भूमिकेत होत्या.
साऊथ चित्रपटसृष्टीसह त्यांनी हिंदी चित्रपटांमध्येही महत्त्वपूर्ण भूमिका साकारली. ‘एक दीवाना था’ तसेच ‘दिल बेचारा’ चित्रपटात दिवंगत अभिनेता सुशांत सिंग राजपूतची आजी म्हणून साकारलेली हिंदी चित्रपटातील त्यांची भूमिका विशेष भावली. सुब्बलक्ष्मी यांनी दूरदर्शनसह अनेक मालिकांमध्येही काम केलं आहे. तसेच त्यांनी अनेक जाहिरातींमध्येही काम केले आहे. त्यांच्या पश्चात अभिनेता, नृत्यांगना थारा कल्याणसह त्यांना तीन मुले आहेत.
