vanita kharat news : अभिनेत्री वनिता खरातने या सिनेक्षेत्रात स्वतःचं स्थान स्वतः निर्माण केलं आहे. वनिता खरातचा खूप मोठा चाहतावर्ग आहे. वनिता खरात ही छोट्या पडद्यावरील ‘महाराष्ट्राची हास्यजत्रा’ या कार्यक्रमामुळे घराघरात पोहोचली. ‘कोळीवाड्याची रेखा’ म्हणून ओळखल्या जाणाऱ्या वनिताने तिच्या दमदार अभिनयातून प्रेक्षकांची मने जिंकली आहे. त्यामुळेच आज तिचा स्वतःचा असा चाहतावर्ग निर्माण झाला आहे. वनिताने केवळ मालिकेपुरतं मर्यादित न राहता आपला मोर्चा चित्रपटांकडे वळवला आणि त्यात प्रेक्षकांची मने जिंकण्यात तिला यश आले.
सोशल मीडियावरही वनिता खरात बऱ्यापैकी सक्रिय असते. नेहमीच ती काही ना काही पोस्ट करुन चाहत्यांच्या संपर्कात राहत असते. अशातच अभिनेत्रीने तिच्या इंस्टाग्राम अकाऊंटवरून शेअर केलेल्या एका पोस्टने साऱ्यांचं लक्ष वेधून घेतलं आहे. वनिताने शेअर केलेल्या या पोस्टमध्ये तिने तिच्या वाढदिवसाचे खास सेलिब्रेशन दाखवले आहे. वनिताचा ३१ वा वाढदिवस होता. आणि याच दिवशी तिच्या ‘ठरता ठरता ठरेना’ या नाटकाचा प्रयोगही होता. त्यामुळे मंच, प्रेक्षक, जवळची माणसं, सहकलाकार, मित्रपरिवार या सगळ्यांबरोबर तिने तिचा वाढदिवस साजरा केला.
या खास सेलिब्रेशनची झलक शेअर करत तिने कॅप्शन देत असं म्हटलं आहे की, “३१वा वाढदिवस. रंगमंचावर गेला. १९/०७/२०२५. आजचा दिवस खास होता. कारण तो कामात गेला, स्वप्नांसह गेला, आणि सगळ्यात महत्त्वाचं म्हणजे तो प्रेक्षकांच्या प्रेमात गेला. मी कलाकार आहे. रंग, प्रकाश, शब्द, हालचाली यांच्यात मी माझं आयुष्य वाहिलं आहे. वाढदिवस असो की कोणताही दिवस, माझ्यासाठी खरी भेट म्हणजे प्रेक्षकांनी केलेल्या टाळ्यांचा आवाज, डोळ्यातलं समाधान, आणि मनातून आलेली दाद. हेच प्रेम मिळालं आज. त्यामुळे वाटतं प्रत्येक दिवस हा एक नवा वाढदिवसच असावा”.
पुढे तिने असं म्हटलं आहे की, “जिथे काम असावं, कला असावी, आणि तुमचं असं भरभरुन प्रेम असावं. या प्रवासात साथ देणारा माझा मित्र परिवार, कुटुंब,रसिक प्रेक्षक यांचे मनापासून आभार. माझं तुमच्यावर खूप प्रेम आहे. ३१ पूर्ण आणि प्रवास अजून सुंदर होणार आहे”. वनिताच्या या पोस्टला प्रेक्षकांची भरभरून पसंती मिळाली आहे. आणि कमेंट करत तिच्यावर शुभेच्छांचा वर्षावही केला आहे.
