गणोशोत्सव हा सण महाराष्ट्रात अगदी धुमधडाक्यात साजरा केला जातो. सप्टेंबर महिना उजाडला की चाहुल लागते ती बाप्पाच्या आगमनाची. बाप्पाच्या मुर्तीपासून ते मकर सजवण्यापर्यंत सर्व तयारी सुरू होतात. फुलांच्या माळांची सजावट पासून बाप्पाच्या आरत्या कानावर पडतात. गणेशोत्सव हा सण सगळ्यांसाठी खूप खास असतो. तसाच बाप्पा हा देखील सगळ्याच्या आवडत्या देवतांपैकी एक आहे. गणपती बाप्पा बऱ्याच नावांनी ओळखला जातो. त्यातील एक नाव म्हणजे विघ्नहर्ता. आयुष्यात आलेल्या प्रत्येक विघ्नाला दूर करण्याची ताकद फक्त बाप्पात आहे. संकटात आपण पहिली आठवण काढतो ती विघ्नहर्ता गणपती बाप्पाची. त्यामुळे बाप्पासोबत सगळ्यांच्याच विशेष आठवणी आहेत. अशीच एक आठवण ‘महाराष्ट्राची हास्यजत्रा’ फेम अभिनेत्री शिवाली परबने सांगितली. (shivali parab told her memories about ganpati)
शिवाली आपल्याला ‘महाराष्ट्राची हास्यजत्रा’ कार्यक्रमातून प्रेक्षकांच्या भेटीला येत असते. नुकतीच ती ‘फक्त मराठी सिनेसन्मान’ सोहळ्यात आली होती. रेड कार्पेटवर तिने केलेला खास लूक सगळ्यांच्या पसंतीस पडत आहेत. काळ्या रंगाच्या ड्रेसमध्ये ती शोभून दिसत होती. त्यावेळी तिने ‘इट्स मज्जा’ला दिलेल्या मुलाखतीत तिच्या गणेशोत्सवातील आठवणी सांगितल्या. शिवालीचं मुळ गाव सिंधुदुर्गातील सावंतवाडी-वेंगुर्ले येथे आहे. ती कोकणातील असल्यामुळे गणेशोत्सवाचा कोकणात वेगळाच थाट पहायला मिळतो. कोकणातील या आठवणी शिवालीने शेअर केला. ती सांगते की, “गणपती बाप्पा माझ्यासाठी खूप स्पेशल आहे. माझ्या प्रत्येक सादरीकरणाच्या अगोदर ‘गणपती बाप्पा मोरया’ हे नाव नेहमी मुखात असतं. त्याचं नाव घेऊनच मी माझ्या कामाला सुरुवात करते”.
ती पुढे म्हणाली, “माझ्या गावातील खूप चांगल्या आठवणी आहेत. माझं गाव सावंतवाडी-वेंगुर्ले जवळच. गावी आमच्या घरी गणपती बसवतात. गावच्या घरची गणपतीसाठीची सजावट करण्यासाठी विशेष म्हणजे गव्हाच्या पिठात पाणी घालून चिक तयार करून त्याने पताके चिकटवले जातात. गणपतीच्या मकराची विशेष सजावट केली जाते. रात्री बाप्पाला आणणं या सगळ्या गोष्टी खूप भारी वाटतात. माझ्या गावच्या खूप आठवणी आहेत”, असं म्हणत शिवानीने आपल्या गावातील आठवणींना उजाळा दिला.
शिवालीने चाळीतल्या आठवणींनाही उजाळा देत सांगितलं, “मी आधी चाळीत राहायचे. त्यावेळेच्या खूप छान आठवणी आहेत. तिथे सार्वजनिक गणपती म्हणजे कमाल असायची. रात्रीचं मंडपात थांबणं व बाप्पा येण्याअगोदर रांगोळी काढणं ती रांगोळी म्हणजे चुन्याची रांगोळी. आम्ही संपुर्ण चाळीत ही रांगोळी काढायचो”, तिने चाळीतल्या बाप्पाच्या आठवणींना उजाळा दिला. शिवानी ‘महाराष्ट्राची हास्यजत्रा’ या कार्यक्रमातून महाष्ट्राच्या घराघरात पोहोचली. विविध पात्र साकारत तिने आपली वेगळी ओळख निर्माण केली आहे. तिने साकारलेली शिवाली अवली कोहली हे स्कीट खूप जास्त प्रसिद्ध झाली.
