‘महाराष्ट्राची हास्यजत्रा’ या कार्यक्रमाची क्रेझ संपूर्ण जगभरात पसरली आहे. गेल्या अनेक वर्षांपासून हा कार्यक्रम प्रेक्षकांचे मनोरंजन करण्यात व्यस्त आहे. या कार्यक्रमाला प्रेक्षकांनी अगदी डोक्यावर उचलून धरलं आहे. प्रेक्षकांच्या चेहऱ्यावर हास्य आणण्यात हा कार्यक्रम अगदी यशस्वी ठरला आहे, असे म्हणणे वावगे ठरणार नाही. या कार्यक्रमातील प्रत्येक कलाकार प्रेक्षकांचं मनोरंजन करत असतो. या कार्यक्रमातील कलाकारांना हास्यजत्रेने एक स्वतःची अशी ओळख निर्माण करून दिली आहे. यापैकीच एक कलाकार म्हणजे हास्यवीर प्रभाकर मोरे. (Prabhakar More On Shalu Dance)
प्रभाकर मोरे त्यांच्या कोकणी बोलीभाषेने प्रेक्षकांना नेहमीच हसवतात. ‘महाराष्ट्राची हास्यजत्रा’ कार्यक्रमातील प्रभाकर मोरे यांचे आगळेवेगळे पात्र रसिक प्रेक्षकांच्या नेहमीच पसंतीस पडते. हास्यजत्रेतून ‘चिपळूणचा पारसमणी’ म्हणून ओळख मिळवणारे अभिनेते प्रभाकर मोरे त्यांच्या अभिनयाव्यतिरिक्त नृत्य शैलीमुळे चर्चेत असतात. प्रभाकर मोरे यांचा शालू डान्स जगभरात प्रसिद्ध आहे.
सध्या प्रभाकर मोरे यांच्या शालू डान्सची एक झलक सोशल मीडियावर वाऱ्यासारखी पसरली आहे. गणेशोत्सवानिमित्त प्रभाकर मोरे यांनी चाहतीच्या घरी बाप्पाच्या दर्शनासाठी हजेरी लावली होती. चाहत्यांच्या इच्छेखातर त्यांनी चाळीतच ‘शालू’ गाण्यावर ठेका धरला. त्यांचा हा व्हिडीओ सध्या वाऱ्यासारखा पसरला आहे. या व्हिडिओमध्ये प्रभाकर मोरे त्यांच्या खास शैलीमध्ये ‘शालू झोका दे गं मैना…’ हे गाणं गाताना दिसत आहेत. तसेच या गाण्यावर ते स्वत: तर डान्स करतच आहेत, त्याचबरोबर चाहत्यांनीही ठेका धरलेला पाहायला मिळतोय. दरम्यान हा व्हिडीओ पाहून अनेकांनी प्रभाकर मोरे यांच्या साधेपणाचा कौतुक केलं आहे.
कोकणवासी असलेल्या प्रभाकर मोरेंनी काही दिवसांपूर्वीच राष्ट्रवादीमध्ये प्रवेश केला. सांस्कृतिक पदाच्या अध्यक्षपदाची जबाबदारी प्रभाकर मोरे सांभाळत आहेत. प्रभाकर मोरे यांनी अनेक मालिका आणि चित्रपटांमध्ये विनोदी आणि सहाय्यक अभिनेत्याची भूमिका साकारली. त्यांच्या अभिनयाला प्रेक्षकांची नेहमीच विशेष पसंती मिळते. प्रभाकर मोरे हे आपल्या विनोदी शैलीनं नेहमीच प्रेक्षकांची मनं जिंकतात. ‘पांघरुण’, ‘टकाटक’, ‘कुटुंब’, ‘कट्टी बट्टी’, ‘बाई गो बाई’, ‘भाई-व्यक्ती की वल्ली’, ‘धोंडी चम्प्या – एक प्रेमकथा’ या चित्रपटांमध्ये त्यांनी काम केलं. तसेच ‘कॉमेडीची बुलेट ट्रेन’, ‘महाराष्ट्राची हास्यजत्रा’ या कार्यक्रमांमधील प्रभाकर मोरे यांच्या विनोदी शैलीला प्रेक्षकांनी डोक्यावर उचलून घेतलं.
