‘महाराष्ट्राची हास्यजत्रा’ या लोकप्रिय कार्यक्रमातून अनेक कलाकार मंडळी घराघरात पोहोचले. या कार्यक्रमाने प्रेक्षकांना खळखळून हसवण्यास भाग पाडलं. तर कार्यक्रमातील कलाकारांनी त्यांच्या विनोदी अभिनयाने प्रेक्षकांची मनं जिंकली. या कार्यक्रमानं बऱ्याच नवोदित कलाकारांना उत्तम प्लॅटफॉर्म देत प्रेक्षकांच्या मनात घर करण्याची संधी दिली. या कार्यक्रमातील एका अभिनेत्याचा खूप मोठा चाहतावर्ग आहे. तो अभिनेता म्हणजेच कोकणची संस्कृती जपणारा, चाळीतील संस्कृती जपणारा आपला निखिल बने. (Nikhil Bane Holi Special Video)
निखिलने आजवर त्याच्या हास्यजत्रेतील पंचेसने चाहत्यांना भुरळ घातली आहे. सोशल मीडियावर ही निखिल बऱ्यापैकी सक्रिय असतो. नेहमीच काही ना काही शेअर करत तो चाहत्यांच्या संपर्कात राहत असतो. हास्यजत्रेमुळे लोकप्रियतेस आलेल्या निखिलचे पाय आजही जमिनीवर आहेत याचं उदाहरण म्हणजे निखिल आजही चाळ संस्कृतीत राहणारा मुलगा आहे. इतकी लोकप्रियता मिळवूनही निखिलने त्याची चाळ संस्कृती जपलेली पाहायला मिळते. चाळ संस्कृतीचे वारंवार तो धडे देताना दिसत असतो. अनेक चाळीतल्या कार्यक्रमांचे, चाळीत साजऱ्या केल्या जाणाऱ्या सणांचे अनेक व्हिडीओ, फोटो तो सोशल मीडियावरून शेअर करत असतो.
अशातच निखिलने होळी स्पेशल शेअर केलेल्या एका व्हिडीओने साऱ्यांचं लक्ष वेधून घेतले आहे. शिमगोत्सव असं म्हणत त्यांने हा व्हिडीओ शेअर केला आहे. या व्हिडीओमध्ये कोकणातील परंपरा जपत होळी साजरी केल्याचं पाहायला मिळत आहे. निखिलने शेअर केलेल्या व्हिडीओमध्ये कोकणात होळीनिमित्त खेळले जाणारे खेळे आणि त्यादरम्यान गायली जाणारी गवळण चित्रित केलेली पाहायला मिळत आहे. शंकासुर आणि गवळणचं समीकरण असलेले हे कोकणातील खेळे खेळण्यात निखिलही सहभागी झालेला पाहायला मिळत आहे. टाळ वाजवत निखिलने या होळीनिमित्त कोकणातील खेळांमध्ये सहभाग दर्शवला आहे.
मराठी संस्कृती तसेच कोकणची संस्कृती जपत मुंबईच्या धकाधकीच्या वातावरणात निखिलन शेअर केलेल्या या व्हिडीओने साऱ्यांचं लक्ष वेधून घेतल आहे. होळी म्हणजे केवळ रंगांची उधळण नव्हे तर होळी म्हणजे संस्कृती जपणारा सण आहे हे देखील निखिलने या व्हिडीओमधून अधोरेखित केल आहे, असं म्हणणं चुकीचं ठरणार नाही. निखिलच्या या व्हिडीओवर अनेकांनी कमेंट करत त्याचं कौतुक केलं आहे.