‘महाराष्ट्राची हास्यजत्रा’ या कार्यक्रमाने आजवर प्रेक्षकांच्या मनात घर केलं आहे. या कार्यक्रमाचे लाखो चाहते दिवाने आहेत. आजवर या कार्यक्रमातील कलाकारांनीही त्यांच्या अभिनयाने प्रेक्षकांच्या मनात घर केलं आहे. या कलाकारांना या कार्यक्रमातील विनोदी अंगामुळे पसंती मिळाली आहे. या कार्यक्रमातून ‘भांडुपचा शशी कपूर’ अशी आपली वेगळी ओळख मिळवत अवघ्या महाराष्ट्रात लोकप्रिय झालेला विनोदी अभिनेता म्हणजे निखिल बने. निखिलचा या कार्यक्रमामुळे खूप मोठा चाहतावर्ग झाला आहे. आपल्या विनोदी भूमिकांनी प्रेक्षकांना खळखळून हसवणारा निखिल सोशल मीडियावरही तितकाच सक्रिय असतो. (Nikhil Bane Konkan Tour)
सोशल मीडियावर तो त्याचे अनेक फोटो, व्हिडीओ व त्याच्या कामानिमित्त काही माहिती शेअर करत असतो. अशातच निखिलने कोकण दौऱ्याचा एक व्हिडीओ शेअर केला आहे. या व्हिडीओला प्रेक्षकांनी भरभरुन प्रतिसाद दिला आहे. निखिल हा बरेचदा सण, उत्सव साजरे करायला गावी जात असतो. निखिल हा कोकणातला असून चिपळूण हे त्याचं गाव आहे. अधूनमधून तो त्याच्या गावच्या घरी जात असतो. अशातच निखिलने गावी प्रवास करतानाचा एक व्हिडीओ शेअर केला आहे.
ऐन उन्हाळ्यात कोकणात तुडुंब भरून जाणाऱ्या ट्रेनने चक्क निखिलने प्रवास केला आहे. आलिशान व या खासगी गाडीचा वापर न करता निखिल थेट मेल एक्सप्रेसने गावी पोहोचला आहे. निखिलने चक्क दिवा-सावंतवाडी या पॅसेंजर ट्रेनने प्रवास करत चिपळूण गाठलं आहे. चिपळूणवरून गावी जाण्यासाठी त्याने एसटी बस म्हणजे कोकणच्या लालपरीने प्रवास केला. शेअर केलेल्या व्हिडीओमध्ये त्याने त्याच्या गावच्या घराची झलक व कोकणातल्या निसर्गाची झलक दाखविली आहे. निखिलच्या या व्हिडीओवर नेटकऱ्यांनी कमेंट करत त्याच्या साधेपणाचे कौतुक केलं आहे.
“खरा कोकणी माणूस,जमिनीवर पाय असलेला आमचा चिपळूणकर हिरो”, “आयला हा तर आपल्यातलाच आहे. भावा खूप मोठा हो. कोकण रेल्वेने नाही तर मुंबई गोवा महामार्गावर तुझी मर्सिडीज बीएमडब्लू धावली पाहिजे ज्यात तू बसलेला पाहिजे”, “बने मित्रा, तुम्ही एवढे साधंपणाने राहणारे असाल, असं खरंच वाटलं नव्हतं. आमचे संपूर्ण कुटुंब तुम्हां सर्वांचे खूप मोठे चाहते आहोत, हा साधेपणा असाच टिकवून ठेवा, परमेश्वर भरपूर प्रगती देवो तुम्हांला”, “तू एक असा कलाकार आहेस जो सामान्य जीवन जगतो आहेस आणि हेच खरे जीवन आहे. तुला कसला गर्व नाही. भांडुप स्टेशन ते टेंबी पाडा तू शेअर रिक्षाने जातो आणि ही गावी दिवा पॅसेंजर ट्रेनने जातोस भारी वाटले”, असं म्हणत त्याचं भरभरुन कौतुक केलं आहे.