Maharashtrachi Hasyajatra actor : मराठी सिनेविश्वातील अनेक कलाकार हे कोकणातील आहेत. आणि ही कलाकार मंडळी शूटिंगच्या व्यस्त वेळापत्रकातून वेळ काढत बरेचदा कोकणात त्यांच्या मूळ गावी जाताना दिसतात. सध्या गणेशोत्सवाची कोकणात अधिक धामधूम सुरु असलेली पाहायला मिळत आहे. अशातच अनेक कलाकार हे त्यांच्या कुटुंबासह कोकणात पोहोचले आहेत. निखिल बने, प्रसाद खांडेकर, तितीक्षा तावडे, अंशुमन विचारे, छाया कदम, ही कलाकार मंडळी गणेशोत्सवानिमित्त त्यांच्या कोकणच्या घरी पोहोचले आहेत. अशातच महाराष्ट्राची हास्यजत्रा फेम अभिनेता प्रसाद खांडेकरचा एक व्हिडीओ सोशल मीडियावर तुफान व्हायरल होत आहे.
गणेशोत्सवासाठी प्रसाद गावी गेला आहे. आणि कोकणात तर या सणाची सगळेच आतुरतेने वाट पाहत असतात. भजन हा तर साऱ्यांच्या जिव्हाळ्याचा विषय. गणेशोत्सवासाठी गावी संपूर्ण कुटुंब एका छताखाली आल्याचं पाहायला मिळतं. इतकंच नाही तर भजनासाठी गावकरी, नातेवाईकही जमतात आणि भेटीगाठी होतात. प्रसादही सध्या शूटिंगमधून ब्रेक घेत गावी कुटुंबाला वेळ देत आहे. याची झलक त्याने शेअर केलेल्या व्हिडीओमधून पाहायला मिळत आहे.
आणखी वाचा – ‘ठरलं तर मग’च्या सेटवर जुईची आवडती व्यक्ती कोण?, स्वतःच केला खुलासा, म्हणाली, “आम्ही दोघी…”
“गणपती मधलं गावच भजन म्हटलं की एकदम काळजाला हात घालणारा विषय. आवडती गोष्ट भजन”, असं कॅप्शन देत त्याने टाळ वाजवत भजन म्हटलं आहे. आणि त्याच्या पाठोपाठ जमलेले उपस्थित भजन म्हणताना दिसत आहेत. यावेळी प्रसाद भजन म्हणताना तल्लीन झालेला दिसतोय. त्याचा हा व्हिडीओ पाहून अनेकांनी त्याच्या साधेपणाचं कौतुक केलं आहे. या व्हिडीओमध्ये प्रसादच्या कोकणातील घराची झलकही पाहायला मिळत आहे.
प्रसादचे कोकणातील घर हे कौलारू असून या घराला पारंपरिक टच आहे. गावाकडे गणेशोत्सवात करण्यात येणारे डेकोरेशन यावेळी करण्यात आले आहे. इतकंच नाही तर रात्री खूप उशिराही सगळे जागरण करत गणेशाची सेवा आणि एकत्र आल्यानंतरची धमाल-मस्ती करताना दिसत आहेत. प्रसादने कोकणची संस्कृती दाखवल्याने अनेकांनी कमेंट करत त्याचं कौतुक केलं आहे. “हा जो आनंद आहे कुठेही शोधला तरी मिळत नाही. हा इथेच मिळतो”, “जमिनीवर पाय असलेला कलाकार प्रसाद भाऊ”, अशा कमेंट त्याच्या चाहत्यांनी केल्या आहेत.
