lakshmikant berde daughter swanandi berde New Business : मराठी सिनेविश्वात अशी अनेक कलाकार मंडळी आहेत ज्यांनी अभिनयाबरोबरच जोडधंदा म्हणून व्यवसाय क्षेत्रात पदार्पण केलं आहे. अभिनय ही त्यांची आवड असली तरी याला काहीतरी जोडधंदा हवा म्हणून अनेक कलाकारांनी व्यवसाय क्षेत्राची निवड केली आहे. यांत काहींनी स्वतःचे रेस्टॉरंट, दागिन्यांचा व्यवसाय, साड्यांचा व्यवसाय अशा अनेक व्यवसाय क्षेत्रात पाऊल टाकलं आहे. अभिनयाबरोबर त्यांनी व्यवसाय क्षेत्रातही नाव कमावलेलं पाहायला मिळतंय. अभिनेत्री मृणाल दुसानिस, तेजस्विनी पंडित, रेश्मा शिंदे, अक्षया देवधर, प्राजक्ता माळी या अभिनेत्रींनी स्वतःचा व्यवसाय सुरु केला आहे. काही दिवसांपूर्वीच अभिनेत्री ऋतुजा बागवेने तिच्या नव्या हॉटेलचं उदघाटन केलं.
यापाठोपाठ आता आणखी एका मराठमोळ्या अभिनेत्रीने म्हणजेच स्वानंदी बेर्डेने स्वतःचा व्यवसाय सुरु केला आहे. स्वानंदी ही ज्येष्ठ अभिनेते लक्ष्मीकांत बेर्डे आणि प्रिया बेर्डे यांची लेक आहे. आई वडिलांच्या पाठोपाठ स्वानंदीने अभिनय क्षेत्राची निवड करत अभिनयक्षेत्रात पाऊल टाकलं. अभिनयाबरोबरच स्वानंदी आता व्यवसाय क्षेत्रात उतरली आहे. आणि या आनंदाच्या बातमीबाबत तिने इंस्टाग्राम पोस्ट शेअर करत सांगितलं आहे. स्वानंदीने स्वतःचा ज्वेलरी ब्रँड सुरु केला आहे.
स्वानंदीच्या ज्वेलरी ब्रँडचं नाव कांतप्रिया असे आहे. हे नाव खास आहे कारण तिचे वडील लक्ष्मीकांत यांच्या नावातील कांत आणि आई प्रियाचे नाव एकत्र करुन तिने तिच्या ब्रँडचे नाव कांतप्रिया असे ठेवले आहे. कांतप्रिया या तिच्या नव्या ब्रँडची झलक तिने सोशल मीडियावर शेअर केली आहे. या पोस्टखालील कॅप्शनमध्ये स्वानंदीने असं म्हटलं आहे की, “आज मी माझ्या एका अशा स्वप्नाची पाऊलवाट चालत आहे, जे प्रेमाने, आठवणींनी आणि मनापासून जपलं गेलं. ‘कांतप्रिया’ हा माझ्यासाठी केवळ एक ब्रँड नाही, तर माझ्या हृदयाचाच एक भाग आहे. कारण त्याचं नाव माझ्या वडिलांच्या लक्ष्मीकांत (कांत) आणि आईच्या प्रिया (प्रिया) नावांपासून बनलं आहे. हे दोघं माझं आयुष्य आहेत”.
यापुढे ती म्हणते, “दागिन्यांच्या व्यवसायातील माझा हा प्रवास म्हणजे, माझ्या आईवडिलांचं प्रेम आणि त्यांचा वारसा जपण्यासाठी निवडलेला एक मार्ग आहे. भारतीय परंपरा आणि आधुनिकतेचं एक सुंदर मिश्रण, विशेषतः लग्न, सण- उत्सव आणि रोजच्या खास क्षणांसाठी ‘कांतप्रिया’ आहे. दागिन्यांच्या या नव्या प्रवासात मी तुम्हा सर्वांचं मनापासून स्वागत करते”.
