harshada khanvilkar emotional : ‘झी मराठी पुरस्कार’ सोहळा २०२५ साठी सगळेच कलाकार आणि प्रेक्षकही उत्सुक आहेत. हा सोहळा पाहणं म्हणजे एखादा सण साजरा करण्यासारखं आहे. सगळेच कलाकार या सोहळ्यासाठी एकत्र येत त्यांची कला अगदी पारंपरिक अंदाजात साजरी करतात. यंदाचा पुरस्कार सोहळा हा थोडा खास आहे. कारण या सोहळ्याला झी मराठीच्या साऱ्या कलाकारांना खास सरप्राईज मिळालं आहे. यावेळी कलाकारांचे कुटुंबीय मंचावर त्यांच्या भेटीस आले. आणि त्यांना पाहून साऱ्या कलाकारांचे डोळे पाणावले. यावेळी अभिनेत्री हर्षदा खानविलकर यांना भेटायलाही त्यांच्या कुटुंबातील आणि त्यांच्या जवळची खास व्यक्ती आली. तिला पाहताच हर्षदा भावुक झालेल्या दिसल्या.
सध्या हर्षदा यांचा हा भावुक करणारा व्हिडीओ सोशल मीडियावर तुफान व्हायरल होत आहे. हर्षदा खानविलकर सध्या ‘लक्ष्मी निवास’ या मालिकेत महत्त्वपूर्ण भूमिकेत आहे. त्यांनी या मालिकेत साकारलेल्या लक्ष्मीच्या भूमिकेने अल्पावधीतच साऱ्यांचं मन जिंकलं आहे. यंदाच्या या पुरस्कार सोहळ्यात त्यांनाही पुरस्कार मिळाला आहे पण तो पुरस्कार नेमका कोणता आहे याचा उलगडा ११ वा १२ तारीखला होईल. हर्षदा यांना भेटायला त्यांची धाकटी बहीण अर्चना आली होती. यावेळी बहिणीला पाहताच त्यांच्या डोळ्यात अश्रू आले. यावेळी त्यांनी एक भावनिक आठवणही शेअर केली.
समोर आलेल्या व्हिडीओमध्ये हर्षदा खानविलकर सांगतात, “अर्चना माझी धाकटी बहीण आहे. आम्ही लहान असताना आमच्यात फार बरे संबंध नव्हते. पण, हळुहळू परिस्थिती फार बदलली. आम्ही दोघींनी मिळून आमच्या आयुष्यातलं सर्वात मोठं दुःख पचवलं. माझे वडील गेले… त्यानंतर अर्चना आणि मी एकमेकांवर खूप जास्त अवलंबून राहायला लागलो”.
आणखी वाचा – सुप्रसिद्ध पंजाबी गायकाचे निधन, अपघाती मृत्यूने चाहते भावुक, १२ दिवसांपासून होता व्हेंटिलेटरवर आणि…
पुढे त्या म्हणाल्या, “आता अर्चना माझ्यासाठी बहीण आहे, लेक आहे. कधीकधी ती माझी आई होते आणि आता तर ती माझी सर्वात जवळची मैत्रीण झाली आहे. या सगळ्यात एक महत्त्वाची गोष्ट म्हणजे तिने मला आयुष्यात सगळ्यात मौल्यवान गिफ्ट दिलं. ते गिफ्ट म्हणजे तिचा मुलगा. त्याला मी माझा ‘बुढापे का सहारा’ म्हणते. त्याच्यासारखं मौल्यवान गिफ्ट मला कधीच कुणी देऊ शकणार नाही”.
