prada kolhapuri chappal controversy : कोल्हापूरच्या कोल्हापुरी चपला या जगभरात प्रसिद्ध आहेत. कोल्हापूरची, आपल्या महाराष्ट्राची ओळख असलेल्या या चपलांनी आता विदेशात स्थान मिळवलं आहे. हो. दोन दिवसांपासून सतत कोल्हापुरी चपलांचा घवघवा परदेशात सुरु असल्याचं कानावर येत होतं. त्याचे व्हिडीओ, फोटो समोर येत होते, पण नेमकं हे प्रकरण काय आहे हे कळत नव्हतं. प्राडा जागतिक ब्रँडने इटली येथे आयोजित कार्यक्रमात ‘मेन स्प्रिंग समर २०२६’ कलेक्शन सादर केले. या कार्यक्रमात मॉडेलच्या पायातील चप्पल ही कोल्हापुरी होती. हे पाहताच या जगविख्यात कंपनीवर कोल्हापुरी चप्पल चोरी केल्याचा आरोप केला जात आहे. सुरुवातीला आपली महाराष्ट्राची ओळख परदेशात झळकली म्हणून कौतुक वाटत होतं. मात्र, कालांतराने यामागचं खरं कारण समोर आलं.
अभिमान वाटणारी गोष्टच चोरीला गेली?, असं वाटू लागलं. हो. प्राडाने आपल्या कोल्हापुरी चपलेला कोल्हापुरी चपला हा दर्जा न देता केवळ लेदर शूज असा उल्लेख केला. तपकिरी चामडे, पायाचा अंगठा, आणि तोच आकार असलेली आपली कोल्हापुरी चप्पल जेव्हा विदेशात झळकते तेव्हा छाती गर्वाने फुलून येते. मात्र, या सगळ्यात आपल्या ओळखीचा, आपल्या निर्मितीचा नामोनिशाणही दिसत नाही तेव्हा वाईट वाटतं. आपल्याकडे ५०० ते १५०० च्या भावात मिळणारी ही कोल्हापुरी चप्पल जेव्हा प्राडासारखा ब्रँड १ लाख ते १.२ लाख रुपयांमध्ये विकतो तेव्हा वाईट वाटतं.
आणखी वाचा – ४१ वर्षांनी अंतराळात पोहोचला शुभांशु शुक्ला, लेकाची कर्तबगारी पाहून आईला रडू अनावर, वडीलही भावुक झाले अन्…
विदेशातील फॅशन शो पाहिल्यानंतर जेव्हा हा वाद चिघळला, त्यानंतर भारतीय नागरिक संताप व्यक्त करताना दिसले. इतकंच नाही तर अनेक मराठी कलाकार मंडळींनीही यावर आक्षेप घेत पोस्ट केली आहे. लेदर शूज असे न म्हणता याला कोल्हापुरी चप्पल असे नाव देण्यात यावे, आणि आपली कोल्हापूरची शान जगभरात चर्चेत यावी, असं त्यांनी पोस्टमध्ये म्हटलं आहे. शिवाय आपल्याला आपला दर्जा हा मिळायलाच हवा असं म्हणत केदार शिंदे, हेमल इंगळे, विदुला चौघुले, इंद्रनील कामत, इरिना रुडाकोवा, रसिका सुनील या कलाकार मंडळींनी आवाज उठविला आहे.
कोल्हापुरी चपला या आज प्रत्येकाचा दैनंदिन जीवनाचा भाग झाला आहे, असं म्हणणं वावगं ठरणार नाही. सणासुदीला पारंपरिक वेशभूषेत ही चप्पल आवर्जून घातली जाते. या चपलांना जीआय टॅग प्राप्त झाले असून याने सांस्कृतिक आणि प्रादेशिक महत्त्व अधोरेखित केले जात आहे. या चपलांचा इतिहास १२ व्या शतकाशी जोडलेला आहे. पारंपरिक हस्तकलेतून या चपला बनविण्यात आल्या आहेत.
