गेले ३ महिने ज्या शोची सर्वत्र चर्चा सुरू होती असा छोट्या पडद्यावरील सर्वात लोकप्रिय शो म्हणजे बिग बॉस. बिग बॉसचे यंदाचे १७वे पर्व हे अनेक कारणांनी गाजले. अशातच काल (२८ जानेवारी) रोजी या शोचा महाअंतिम सोहळा पार पडला आणि या बिग बॉसच्या यंदाच्या १७व्या पर्वाच्या विजेते पदाचा मानकरी डोंगरीचा लोकप्रिय कॉमेडियन व अभिनेता मुनव्वर फारुकी ठरला. घरात आल्यापासूनच त्याच्या वैयक्तिक आयुष्यात व शोमध्येदेखील अनेक चढ उतार आल्याचे पाहायला मिळाले. पण आपल्या चाहत्यांच्या व शुभचिंतकांच्या पाठिंब्यामुळे मुनव्वरने बिग बॉसच्या ट्रॉफीवर आपले नाव कोरले असं म्हणायला हरकत नाही.
मुनव्वर या शोमध्ये येण्याआधी पासूनच लोकप्रिय होता. अभिनय व स्टँडअप कॉमेडीच्या माध्यमातून तो घराघरांत पोहोचला होता. त्याचबरोबर ‘लॉकअप’ या शोचादेखील तो विजेता होता. त्यामुळे मुनव्वरची लोकप्रियता ही अमाप होती. पण मुनव्वरचा इथपर्यंत येण्याचा प्रवास हा काही साधा सोपा नव्हता. अनेक खडतर व कठोर परिस्थितीवर मात करत त्याने इथपर्यंतचा पल्ला गाठला आहे. चला तर जाणून घेऊयात डोंगरीच्या मुनव्वरचा ‘बिग बॉस विजेता’ होण्यापर्यंतचा प्रवास…
मुनव्वरला लहानपणापासून कविता, शायरी व रॅप लिहिण्याचा आवड आहे. त्याचबरोबर तो स्टँड अप कॉमेडी करण्यातदेखील तितकाच माहीर आहे. बिग बॉसच्या घरात याचा प्रत्यय वेळोवेळी आलाच होता. त्यामुळेच ‘बिग बॉस’च्या घरात असताना मुनव्वरच्या समर्थनार्थ बॉलीवूडचे रॅपर गायक, किंग, बादशाह यांनी पुढाकार घेतला असल्याचे पाहायला मिळाले. याशिवाय अनेक गायकांनी मुनव्वरला भरभरून मतं देण्यासाठी प्रेक्षकांना आवाहनही केलं होतं.
मुनव्वरचे शालेय शिक्षण हे फक्त पाचवी इयत्तेपर्यंतच पूर्ण झालं. त्याला कौटुंबिक कारणांमुळे इयत्ता पाचवीनंतर शाळा सोडावी लागली होती. असा खुलासा मुनव्वरने ‘बिग बॉस’ शोमध्ये रिंकू धवन यांच्यासमोर केला होता. त्याचं प्राथमिक शिक्षण गुजरातमधील जुनागड येथे पूर्ण झालेलं आहे. मुनव्वरच्या शिक्षणात पाचवीनंतर खंड पडला. पण पुढे काही वर्षांनी त्याने उर्वरित शिक्षण पूर्ण केलं.
मुनव्वरचा जन्म २८ जानेवारी १९९२ रोजी गुजरातमधील जुनागडमध्ये झाला. कौटुंबिक समस्या व वडिलांचं आजारपण यामुळे त्याला बालपणापासून काम करावं लागलं होतं. आईच्या निधनानंतर तो मुंबईला आला. त्यानंतर २०२० मध्ये मुनव्वरच्या वडिलांचंही निधन झालं. याशिवाय मुनव्वरने ग्राफिक डिझायनिंगचाही कोर्स केला होता. पण वडिलांच्या आजारपणामुळे त्याला त्याचं शिक्षण सोडावं लागलं होतं. पुढे काही दिवसांनी ग्राफिक डिझायनिंगचा कोर्स पूर्ण केल्यानंतर मुनव्वरने एका नामांकित कंपनीत ग्राफिक डिझायनर म्हणून काम केलं आहे.
मुनव्वर हा एक प्रसिद्ध कॉमेडियन व लोकप्रिय रॅपर म्हणून ओळखला जातो. त्याच्या अनेक कविता व स्टँडअप मधील विनोदी किस्से हे सोशल मीडियावर व्हायरल होत असतात. ‘बिग बॉस’च्या आधी मुनव्वरने ‘लॉकअप’च्या पहिल्या सीझनच्या विजेतेपद जिंकलं होतं.
दरम्यान, ‘दाऊद, यमराज औरत’ या म्युझिक व्हिडीओमुळे तो खऱ्या अर्थाने प्रसिद्ध व लोकप्रिय झाला. तसेच मुनव्वरने नुकतंच २० स्पर्धांवर मात करत ‘बिग बॉस १७’चा विजेता ठरला आहे. त्यामुळे त्याच्या अनेक चाहत्यांकडून त्याच्यावर कौतुकाचा वर्षाव होत आहे.
