लोकसभा निवडणुका या अवघ्या काही दिवसांवर येऊन ठेपल्या आहेत. त्यामुळे प्रत्येक राजकीय पक्ष आगामी निवडणुकीसाठी उमेदवार जाहीर करत आहेत. अशातच लोकसभा निवडणुकीसाठी भाजपाची पाचवी यादी जाहीर झाली आहे. या यादीत एक लोकप्रिय व अपेक्षित नाव समोर आले आहे आणि हे लोकप्रिय नाव म्हणजे बॉलिवूड अभिनेत्री कंगना रणौत. अभिनेत्री कंगणाला लोकसभेची उमेदवारी जाहीर झाली असून भाजपकडून तिला तिकीट देण्यात आलं आहे.
हिमाचल प्रदेशातील मंडी या लोकसभा मतदारसंघातून कंगना लोकसभेची निवडणूक लढवणार आहे. कंगनाच्या सोशल मीडियाच्या पोस्टमुळे ती फार चर्चेत असते. त्यामुळे तिला भाजपमधून तिकीट मिळणार असल्याचं म्हटलं जात होतं. अखेर या सर्व चर्चांना पूर्णविराम लागला असून कंगना हिमाचल प्रदेशातून तिकीट देण्यात आलं आहे. भाजपाने कंगनाला तिकिट दिल्यानंतर कंगनाची प्रतिक्रियाही समोर आली आहे.
My beloved Bharat and Bhartiya Janta’s own party, Bharatiya Janta party ( BJP) has always had my unconditional support, today the national leadership of BJP has announced me as their Loksabha candidate from my birth place Himachal Pradesh, Mandi (constituency) I abide by the high…
— Kangana Ranaut (@KanganaTeam) March 24, 2024
कंगणाने एक्स (पूर्वीचे ट्विटर)वर तिची प्रतिक्रिया देत असं म्हटलं आहे की, “माझा प्रिय भारत आणि भारतीय जनता पक्षाचा (भाजप) मला नेहमीच बिनशर्त पाठिंबा मिळाला आहे. आज भाजपच्या राष्ट्रीय नेतृत्वाने मला माझ्या जन्मभूमी हिमाचल प्रदेश, मंडी (मतदारसंघ) येथून त्यांचा लोकसभा उमेदवार म्हणून घोषित केले आहे. हा माझ्यासाठी मोठा बहुमान आहे. मला आपल्या पक्षात अधिकृतपणे सामील केल्याबद्दल मला आनंद झाला आहे आणि हा मी माझा सन्मान समजते.
यापुढे तिने असं म्हटलं आहे की, “मी एक योग्य कार्यकर्ता आणि एक विश्वासार्ह लोकसेवक होण्यासाठी उत्सुक आहे.” दरम्यान, आपल्या अभिनयाने रुपेरी पडदा गाजवणारी ही कंगणा रणौत आता लोकसभेच्या रिंगणातून जनतेच्या मनात पोहचणार का? आणि जनता तिला काय कौल देणार? हे पाहणं आता महत्त्वाचं ठरणार आहे. त्यामुळे आगामी निवडणुकीसाठी कंगणासह तिचे अनेक चाहतेही चांगलेच उत्सुक आहेत हे नक्की.
