करिअरच्या सुरुवातीच्या काळामध्ये सुपरहिट मालिका देत जुई गडकरीने प्रेक्षकांच्या मनावर अधिराज्य गाजवलं. तिने छोट्या पडद्यावर विविध भूमिका साकारत अभिनेत्री म्हणून स्वतःला सिद्ध केलं. जुईची कामाप्रती असणारी जिद्द, चिकाटी तेवढीच आहे. मध्यंतरी ती आजारपणामुळे पुरती खचली होती. मात्र त्यामधूनही जुईने हिंमत हारली नाही. आजारपणावर मात करत तिने नव्या जोमाने काम करण्यास सुरुवात केली. इतकंच काय तर आजारी असतानाही ही शारीरिक त्रास सांभाळून शूट करायची. आताही तिची ‘ठरलं तर मग’ मालिका टॉपला आहे. शूटदरम्यान कितीही अडचणी आल्या, आजारी असली तरी जुई कामाला प्रथम प्राधान्य देते. (Jui gadkari viral video)
सोमवारपासून राज्यभरात पावसाने चांगलाच जोर धरला आहे. याचा फटका काही शहरांना बसला. दरम्यान काही ठिकाणी पावसाचं पाणीही साचलं. कामासाठी बाहेर पडलेल्यांना प्रवास करतानाही बऱ्याच अडचणींचा सामना करावा लागत आहे. जुईलाही याचा सामना करावा लागला. सकाळी शूटसाठी ती निघाली असताना जोरदार पाऊस होता. रस्त्यात पाणी साचलं होतं. मात्र जुई काही थांबली नाही.
रस्त्यांना नद्यांचं स्वरुप आलं होतं. शिवाय वेळेत मालिकेच्या शूटसाठीही जुईला पोचायचं होतं. तिने एकाच ठिकाणी न थांबता रिक्षाने प्रवास करायचा ठरवलं. रिक्षाने प्रवास करत असताना रस्तेही जलमय झाले होते. पाणी साचलेल्या रस्त्यांमधूनच ती शूटसाठी पुढे गेली. यादरम्यानचा संपूर्ण प्रकार तिने कॅमेऱ्यात कैद केला. व्हिडीओ शूट करत तिने इन्स्टाग्राम स्टोरीद्वारे चाहत्यांसह शेअर केला आहे. तसेच तिने व्हिडीओला हटके कॅप्शनही दिलं आहे.
आणखी वाचा – “कोणाचं घर तोडायला प्रेम केलं नाही”, अरुणा इराणी यांचं लग्नाबाबत भाष्य, म्हणाल्या, “तुमचा नवरा…”
“सकाळी बोट राइड करत शूटला आले” असं कॅप्शन जुईने दिलं. रस्त्यांवर तुडूंब पाणी भरलेलं दिसत आहे. यामधील राग येणारी गोष्ट म्हणजे पाण्यामध्ये प्लॅस्टिक, इतर कचरा तरंगताना दिसत आहे. सर्वसामान्यांप्रमाणेच सेलिब्रिटींनाही अनेक सामाजिक प्रश्नांचा सामना करावा लागत आहे. कित्येकदा तर मढ परिसरात शूटसाठी जात असताना कलाकारांना ट्राफिकचाही सामना करावा लागतो. पावसात तर ट्राफिकच्या समस्या आणखीनच वाढतात. अजूनही रस्त्यांवर पाणी भरणं, ट्राफिक या समस्या जैसे थेच आहेत.
