बदलत्या काळानुसार कलाक्षेत्रातीलही अनेक गणितंही बदलत गेली. तंत्रज्ञान, काम करण्याची पद्धत, कलाकारांच्या सोयी-सुविधा असे अनेक बदल इंडस्ट्रीमध्ये झाले. अशातच एक नवा प्रकार काही वर्षांपूर्वी रुजला तो म्हणजे पापाराझी फोटोग्राफर्स. सोशल मीडिया आधीच अधिक वेगाने प्रचलित झालं असतं तर पापाराझीने बहुदा आधीच जन्म घेतला असता. असो आता पापाराझींमुळे कलाकारांचे विविध पैलु समोर येतात. त्याहीपेक्षा आपला लाडका कलाकारा कुठे जातो, त्याचे ट्रेंडिंग लूक समोर येतात. चाहत्यांना हे पाहण्यात अधिक रस असतो. मात्र बऱ्याचदा कलाकारांचा खरा चेहरा पापाराझींमुळे समोरही येतो. असंच काहीसं जया बच्चन यांच्याबाबतीत घडताना दिसतं. (Jaya bachchan angry on paparazzi)
फोटोग्राफर्सला पाहिलं की, जया यांना नेमकं काय होतं? असा प्रश्न सातत्याने नेटकऱ्यांच्या मनात डोकावतो. एखादा कार्यक्रम, पुरस्कार सोहळा किंवा रेडकार्पेटवर पापाराझींनी जया यांना घेरलं की, त्यांचा राग अनावर होतो. कित्येकदा तर त्या फोटोग्राफर्सवर ओरडूनच बोलतात. क्वचितच त्यांचा मूड चांगला असेल तर त्या हसताना दिसतात. अशातच आता त्यांचा रुद्र अवतार दाखवणारा व्हिडीओ समोर आला आहे.
रानी मुखर्जी व काजोलचे काका दिग्दर्शक रोनो मुखर्जी यांचं काही दिवसांपूर्वी निधन झालं. रोनो यांची प्रार्थना सभा ठेवण्यात आली होती. यावेळी बॉलिवूडमधील अनेक मंडळी उपस्थित होती. दरम्यान जयाही या प्रार्थना सभेला पोहोचल्या. मंगळवारी रोनो यांच्या घरी प्रार्थना सभा ठेवण्यात आली. जया त्यांची लेक श्वेता बच्चनसह रोनो यांच्या घरी गेल्या. प्रार्थना सभेमधून बाहेर येताना त्यांनी पापाराझी छायाचित्रकारांना पाहिलं. त्यांना पाहून जया अचानक भडकल्या आणि ओरडू लागल्या.
जया फोटोग्राफर्सना ओरडल्या. म्हणाल्या, “चला तुम्हीही माझ्याबरोबर या. तुम्ही सगळेच बकवास आहात. सगळेच्या सगळे घाणेरडे आहात”. जया यांना चिडलेलं पाहता श्वेताने त्यांना गाडीमध्ये बसवलं. तरीही जया शांत बसल्या नाहीत. त्या गाडीमध्ये बसूनही पुन्हा एकदा फोटोग्राफर्सना ओरडल्या. म्हणाल्या, “या या आता गाडीमध्ये येऊन बसा”. जया यांचा व्हिडीओ सोशल मीडियावर तुफान व्हायरल झाला आहे. अशा अभिनेत्रीचं शूट न करण्याचा सल्ला अनेकांनी कमेंट्सच्या माध्यामातून पापाराझींना दिला आहे.
