‘जाने तू या जाने ना’ या चित्रपटातून प्रसिद्धीच्या झोतात आलेला अभिनेता म्हणजे इम्रान खान. मागच्या काही काळापासून इम्रान त्यांच्या पत्नीबरोबरच्या बिघडलेल्या नातेसंबंधांमुळे चांगलाच चर्चेत आहेत. इम्रान खानने २०११ मध्ये अवंतिका मलिकबरोबर लग्न केलं होतं. मात्र, २०१९ मध्ये या दोघांमध्ये भांडण सुरू असल्याचं समोर आलं. त्यानंतर सातत्यानं या दोघांमध्ये घटस्फोट झाल्याच्या अनेक चर्चा रंगताना दिसल्या. त्यामुळे आपल्या वैवाहिक आयुष्यामुळे किंवा खाजगी आयुष्यामुळे हा अभिनेता कायमच चर्चेत राहत असतो.
अशातच नुकताच त्याने लेखा वॉशिंग्टनबरोबरच्या नात्याबद्दलही खुलासा केला. वोग इंडियाला दिलेल्या मुलाखतीत इम्रानने त्याच्या वैयक्तिक आयुष्याबद्दलचे अनेक खुलासे केले. यावेळी इम्रानने लेखा वॉशिंग्टनबरोबरच्या त्याच्या नात्याला दुजोरा दिला होता. अशातच आता अभिनेता पुन्हा एकदा चर्चेत आला आहे आणि या चर्चेचं कारण म्हणजे त्याने नुकतेच मुंबईत घर घेतले आहे. इम्रानने चित्रपट निर्माता करण जोहरचे जुने अपार्टमेंट भाड्याने घेतले असून तो त्याची गर्लफ्रेंड लेखा वॉशिंग्टनबरोबर या अपार्टमेंटमध्ये राहणार आहे.
काही मीडिया रिपोर्टनुसार, इम्रानने करण जोहरचे वांद्रे येथील ३ मजली सी-फेसिंग अपार्टमेंट भाड्याने घेतले आहे. हे अपार्टमेंट क्लिफपेट, पाली हिल येथे आहे आणि इम्रान गर्लफ्रेंड लेखा वॉशिंग्टनबरोबर या घरात राहण्यास आला आहे. या जोडप्याने करण जोहरचे घर तीन वर्षांच्या करारावर भाड्याने घेतले असून त्यासाठी त्यांना दर महिन्याला करण जोहरला नऊ लाख रुपये भाडे द्यावे लागणार आहे.
दरम्यान, इम्रानने ‘जाने तू या जाने ना’ या चित्रपटातून आपल्या करिअरला सुरुवात केली. यानंतर तो ‘आय हेट लव्ह स्टोरीज’, ‘मेरे ब्रदर की दुल्हन’, ‘लक’ आणि ‘किडनॅप’सारख्या अनेक चित्रपटांमध्ये दिसला. पण त्याचे चित्रपटातील करिअर काही खास नव्हते आणि त्यानंतर त्याने स्वत:ला मनोरंजन विश्वापासून दूर केले. नुकतीच त्याने चित्रपटसृष्टीमधील पुनरागमनाची घोषणा केली होती. परंतु, अद्याप याविषयी काहीही अधिकृत माहिती समोर आलेली नाही.
