Famous Actress Statement On Trolling : दाक्षिणात्य चित्रपटसृष्टीत झपाट्याने नाव कमावणारी अभिनेत्री श्रीलीला सध्या पुन्हा एकदा चर्चेत आली आहे. तिच्या आगामी प्रोजेक्ट्ससोबतच तिने अलीकडे केलेल्या खुलास्यांमुळेही चाहत्यांचे लक्ष वेधले आहे. तेलुगू इंडस्ट्रीमध्ये स्वतःचं वेगळं स्थान निर्माण करणारी श्रीलीला लवकरच ‘उस्ताद भगत सिंग’ या चित्रपटात झळकणार आहे. या चित्रपटात ती पवन कल्याण यांच्यासोबत स्क्रीन शेअर करताना दिसणार आहे. तिच्या करिअरची ही महत्त्वाची पायरी मानली जात आहे.
मात्र, आज यशाच्या शिखरावर असलेल्या श्रीलीलाचा प्रवास सुरुवातीला सोपा नव्हता. अलीकडेच तिने सुमा कनकवाला यांच्या ‘The Reel Flavor’ या चॅट शोमध्ये सहभाग घेतला. यावेळी तिने इंडस्ट्रीत सुरुवातीच्या काळात झालेल्या ट्रोलिंगबद्दल मनमोकळेपणाने सांगितले. श्रीलीला म्हणाली की, “मी इंडस्ट्रीत नवीन असताना ट्रोलिंगमुळे मला खूप त्रास व्हायचा. मी खूप भावनिक व्हायचे आणि अनेकदा रडायचेही. मला हे सगळं जमत नाही असं वाटायचं, त्यामुळे मी परत शिक्षणाकडे वळावं का?, असा विचारही मनात यायचा.”
ती पुढे सांगते, “काळानुसार मी या गोष्टींकडे दुर्लक्ष करायला शिकले. आता ट्रोलिंगचा माझ्यावर काहीही परिणाम होत नाही. लोकांची विचारसरणीही बदलली आहे. नकारात्मकतेकडे जास्त लक्ष न देता योग्य गोष्टींचा विचार करण्याकडे लोकांचा कल वाढला आहे.” दरम्यान, श्रीलीला केवळ दक्षिणेतच नव्हे तर बॉलिवूडमध्येही पाऊल टाकत आहे. ती लवकरच Kartik Aaryan सोबत एका हिंदी चित्रपटात झळकणार आहे. याबाबत अद्याप अधिकृत घोषणा झालेली नाही. एकूणच, संघर्षातून पुढे येत स्वतःची ओळख निर्माण करणारी श्रीलीला आज अनेकांसाठी प्रेरणादायी ठरत आहे. तिच्या आगामी प्रोजेक्ट्सकडे आता चाहत्यांचे लक्ष लागले आहे.
