Hruta Durgule award : नुकताच ६० आणि ६१ वा महाराष्ट्र चित्रपट पुरस्कार सोहळा पार पडला. या पुरस्कार सोहळ्यासाठी मुख्यमंत्री देवेंद्र फडणवीस, उपमुख्यमंत्री अजित पवार आणि सांस्कृतिक कार्य मंत्री ऍड. आशिष शेलार यांच्यासह अनेक मान्यवर उपस्थित होते. यंदाच्या या पुरस्कार सोहळ्याला अनेक बॉलिवूड कलाकारांचीही उपस्थिती पाहायला मिळाली. या सोहळ्यात राज कपूर जीवन गौरव पुरस्कार ज्येष्ठ अभिनेते अनुपम खेर यांना प्रदान करण्यात आला. गानसम्राज्ञी लता मंगेशकर पुरस्कार गझलगायक भीमराव पांचाळे यांना प्रदान करण्यात आला. तसंच, चित्रपती व्ही. शांताराम जीवन गौरव पुरस्कार अभिनेता आणि दिग्दर्शक महेश मांजरेकर यांना तर चित्रपती व्ही. शांताराम विशेष योगदान पुरस्कार अभिनेत्री मुक्ता बर्वे यांना प्रदान करण्यात आला.
तर मृण्मयी देशपांडेला सहाय्यक अभिनेत्रीचा पुरस्कार मिळाला. तर आर्या आंबेकरला उत्कृष्ट पार्श्वगायिकेचा पुरस्कार मिळाला. तर लोकप्रिय अभिनेत्री ऋता दुर्गुळेला अनन्या या चित्रपटासाठी सर्वोत्कृष्ट पदार्पणाचा पुरस्कार मिळाला. याबाबतचा आनंद तिने तिच्या इंस्टाग्राम अकाउंटवर पोस्टद्वारे शेअर केला आहे. हृताने ट्रॉफीबरोबरचा फोटो शेअर करत लिहिलं, “मी कृतज्ञतेने भारावून गेले आहे. ६० व्या ६१ व्या महाराष्ट्र राज्य पुरस्कारांमध्ये माझ्या ‘अनन्या’ चित्रपटासाठी सर्वोत्कृष्ट पदार्पणाचा पुरस्कार मिळाल्याबद्दल मला अभिमान आहे. मी अधिक परिश्रम करण्यास आणि अर्थपूर्ण प्रोजेक्ट निवडण्याचा प्रयत्न करेन”.
पुढे अभिनेत्रीने ‘अनन्या’ चित्रपटाचे दिग्दर्शक प्रताप फड यांना टॅग करत त्यांचे अभिनंदन केले. हृताने लिहिले, “सर्वोत्कृष्ट पदार्पणाचा दिग्दर्शक पुरस्कार तुम्हाला मिळाला, त्यासाठी मी खूप आनंदी आहे. तुम्ही मला ‘अनन्या’ या चित्रपटासाठी कास्ट केले, त्यासाठी मी कायमच तुमची ऋणी असेन. तुमच्याशिवाय हे शक्य झाले नसते. माझा प्रत्येक पुरस्कार तुम्हाला समर्पित असेल”, असं म्हणत आनंद व्यक्त केला. या पोस्टमध्ये अभिनेत्रीने तिच्या या प्रवासात साथ देणाऱ्या अनेकांचे आभार मानले आहेत. तसेच, चित्रपटाचे निर्माते रवी जाधव यांच्याप्रतिदेखील कृतज्ञता व्यक्त केली आहे. अभिनेत्रीने पती प्रतीक शाहचेदेखील आभार मानले आहेत. तिने प्रतीकला टॅग करत लिहिले, “तुझ्या माझ्या आयुष्यात असण्याने तू माझं जग आणखी उत्तम केले आहेस”. शेवटी तिने तिच्या आयुष्यातील प्रत्येक टप्प्यावर साथ देणाऱ्या तिच्या कुटुंबाचेदेखील आभार मानले आहेत.
ऋताला पुरस्कार मिळताच तिचा पती प्रतीक शाहने देखील बायकोचं तोंडभरून कौतुक केलं. प्रतीकने हृतासाठी खास पोस्ट शेअर करत लिहिलं की, “महाराष्ट्र राज्य सर्वोत्कृष्ट पदार्पण हा पुरस्कार तुला मिळाल्याने सर्वत्र प्रथम अभिनंदन. मला तुझा खूप अभिमान आहे. तुला अपेक्षा आहे त्याहीपेक्षा तू खूप पुढे जाणार आहेस. माझी सुपरस्टार”.
