Keshavrao Bhosale Theatre : मनोरंजन क्षेत्राशी संबंधित एक मोठी बातमी समोर येत आहे ती म्हणजे कोल्हापुरातील ऐतिहासिक वारसा असलेल्या केशवराव भोसले नाट्यगृहाला भीषण आग लागली आहे. आगीच्या घटनेनंतर अग्निशमन दलाच्या गाड्या घटनास्थळी दाखल झाल्या असून आगीवर नियंत्रण मिळवण्याचे प्रयत्न सुरू आहेत. रात्री साडे नऊ ते दहाच्या सुमारास ही आग लागल्याची माहिती आहे. कोल्हापूरातील खासबाग मैदानावरील व्यासपीठाच्या लाकडी स्टेजला आग लागल्याचा अंदाज आहे. खासबाग कुस्ती मैदानाच्या बाजूने आग लागल्याचा अंदाज असून त्यानंतर हीच आग केशवराव भोसले नाट्यगृहाला लागत पुढे आली. केशवराव भोसले नाट्यगृह हे संपूर्ण लाकडाचं असल्याने आग मोठ्या प्रमाणात भडकली. आगीचं कारण अद्याप समोर आलं नाही. नाट्यगृहात कोणीही नसल्याने कोणतीही जिवितहानी झाली नसल्याची माहिती मिळते आहे. केशवराव भोसले नाट्यगृहाचा संपूर्ण स्टेज जळून खाक झाला आहे. आगीचे वृत्त कळताच मनोरंजन विश्वातून हळहळ व्यक्त केली जात आहे. (Keshavrao Bhosle Theatre fire)
मराठी अभिनेता व दिग्दर्शक सुबोध भावेने केशवराव भोसले सभागृहाला लागलेल्या आगीबद्दल त्याच्या भावना व्यक्त केल्या आहेत. इन्स्टाग्राम स्टोरीवर त्याने एक पोस्ट शेअर करत असं म्हटलं आहे की, “केशवराव भोसले नाट्यगृहाच्या आगीची दृश्ये अत्यंत भयंकर आहेत. केशवराव भोसले यांच्या नावाचे नाट्यगृह त्याच दिमाखात पुन्हा उभे राहायला हवे. महाराष्ट्रातील अत्यंत देखणे नाट्यगृह.” सांगीतकर व गीतकार सलील कुलकर्णी यांनीही नाट्यगृहाच्या आगीचा व्हिडीओ शेअर करत त्यांच्या भावना व्यक्त केल्या आहेत. “अतिशय आवडतं नाट्यगृह” म्हणत त्यांनी या प्रकरणी हळहळ व्यक्त केली आहे. तर रंगकर्मी प्रशांत दामले यांनी फेसबुक पोस्ट शेअर करत “संगीतसूर्य केशवराव भोसले नाट्यगृह हे आम्हा नाटकवाल्यांचं अत्यंत आवडतं नाट्यगृह आगीच्या भक्ष्यस्थानी” असं म्हटलं आहे.
नाट्यगृहाला आग लागल्याने अनेकांकडून दु:ख व्यक्त केलं जात आहे. अनेक कलाकार, आमदार घटनास्थळी दाखल झाले आहेत. कलाकारांना अश्रू अनावर झाले आहेत. केशवराव भोसले नाट्यगृह जळताना बघवत नसल्याच्या भावना त्यांनी व्यक्त केल्या आहेत. केशवराव भोसले नाट्यगृहाला मोठा इतिहास आहे. त्यामुळे नाट्यगृहाला लागलेली आग ही खूप मोठी घटना आहे.
राजर्षी शाहू महाराजांच्या पुढाकाराने या नाट्यगृहाची उभारणी करण्यात आली होती. १९१३ ते १९१५ या काळात ते बांधलं गेलं. याचा रंगमंच २० फूट बाय ३४ फूट इतका प्रशस्त आहे. या नाट्यगृहाचं वैशिष्ट्य म्हणजे यामध्ये प्रेक्षकांना रंगमंच पाहताना अडथळा ठरेल, असा एकही खांब नाही. राजर्षी शाहू महाराजांनी साकारलेल्या आणि त्यांच्या पदस्पर्शाने पावन झालेल्या या रुबाबदार वास्तूंनी पैलवानांच्या आणि कलाकारांच्या अनेक पिढ्या अंगाखांद्यावर खेळवल्या आणि या नाट्यगृहात अक्षरशः जगवल्या.
