हिंदी चित्रपटांपाठोपाठ आता मराठी चित्रपटही बॉक्स ऑफिसवर गल्ला करताना दिसत आहेत. ‘वेड’, ‘बाईपण भारी देवा’ या चित्रपटांनी कोट्यवधींचं घर गाठलं. या पाठोपाठ आता आणखी एक चित्रपट बॉक्स ऑफिसवर धुमाकूळ घालत आहे. हेमंत ढोमे दिग्दर्शित ‘झिम्मा २’ हा चित्रपट प्रदर्शित झाला असून या चित्रपटाने प्रेक्षकांच्या मनावर राज्य केलं आहे. या चित्रपटाची सर्वत्र चर्चा सुरु असताना या चित्रपटाने एका दिवसांत किती कलेक्शन केलं हे नुकतंच समोर आलं आहे. (Jhimma 2 Box Office Collection)
‘झिम्मा २’मध्ये सात बायकांची मैत्री अधिकच घनिष्ट दिसणार आहे. सात मैत्रिणी व त्याच्या सात तऱ्हा चित्रपटात पाहायला मिळत आहे. प्रत्येकीची प्रेम व्यक्त करण्याची भाषा वेगळी असलेली पाहायला मिळत आहे.हे सार ‘झिम्मा २’ मध्ये अनुभवायला मिळत आहे. ‘झिम्मा २’ चित्रपटात दिग्गज कलाकारांची फौज पाहायला मिळाली. इतकंच नव्हे तर या कलाकारांच्या मांदियाळीने अक्षरशः धुमाकूळ घातला आहे. चित्रपटात सुहास जोशी, निर्मिती सावंत, सुचित्रा बांदेकर, क्षिती जोग, सायली संजीव, रिंकू राजगुरू, शिवानी सुर्वे, सिद्धार्थ चांदेकर पाहायला मिळत आहेत.
‘झिम्मा २’ चित्रपटाच्या टिझर, ट्रेलरने धुमाकूळ घातलाचं, त्यांनतर चित्रपटातील ‘मराठी पोरी’ या गाण्याने सोशल मीडियावर अक्षरशः साऱ्यांना थिरकायला भाग पाडलं. अशातच आता हा चित्रपट चित्रपटगृहात धमाल करायला भाग पाडत आहे. चित्रपट प्रदर्शित होऊन एक दिवस झाला असून या चित्रपटाने एका दिवसात करोडोंचा गल्ला जमवला आहे. ‘Sacnilk Team ‘ या वेबसाईटने दिलेल्या माहितीनुसार, ‘झिम्मा २’ चित्रपटाचं एका दिवसाचं कलेक्शन समोर आलं आहे. ‘झिम्मा २’ या चित्रपटाने एका दिवसात १ करोड २० लाख इतके रुपये कमावले आहेत.
‘झिम्मा २’ या चित्रपटाला महिला वर्गाचा विशेष प्रतिसाद मिळताना पाहायला मिळत आहे. लवकरच हा चित्रपट भरघोस कमाई करेल अशी अपेक्षा आहे.