सध्या सोशल मीडियावर असंख्य कंटेट क्रिएटर्स आहेत. पण काही कंटेंट क्रिएटर्सनी आपल्यातल्या वेगळ्या कौशल्याने नेटकऱ्यांसह अनेकांची मनं जिंकली आहेत. यापैकीच एक म्हणजे लोकप्रिय व प्रसिद्ध कंटेट क्रिएटर म्हणजे बिनधास्त मुलगी फेम गौरी पवार. छोटीशी दिसणारी पण आपल्या व्हिडीओच्या माध्यमातून सर्वांच्या चेहऱ्यावर हसू फुलवणारी गौरी पवार सध्या सोशल मीडियावर चांगलीच चर्चेत आहे.
गौरी ही तिच्या आजीबरोबरचे अनेक व्हिडीओ शेअर करत असते. त्यामुळे तिच्यासह तिची आजीही सोशल मीडियावर चांगलीच चर्चेत असते. मोबाईलच्या स्क्रीनवरील या आजी-नातीच्या लोकप्रिय जोडीने नुकतीच टीव्हीवरील लोकप्रिय विनोदी कार्यक्रम ‘हसताय ना? हसायलाच पाहिजे’मध्ये हजेरी लावली होती. यानिमित्ताने या विनोदी कार्यक्रमाचा निवेदक, दिग्दर्शक व अभिनेता निलेश साबळेने या आजींसाठी एक खास पोस्ट शेअर केली आहे.
या पोस्टमध्ये निलेश साबळेने आजींचे कौतुक करत असं म्हटलं आहे की, “काही जणांसाठी वय हा फक्त आकडा असतो. सध्या आपल्या ‘हसताय ना हसायलाच पाहिजे’ या कार्यक्रमात काही रील बनविणाऱी कुटुंब सहभागी होत आहेत. ७५ पेक्षा जास्त वय असणाऱ्या गौरी पवारच्या आजीसुद्धा सहभागी झाल्या आहेत. या वयातसुद्धा आयुष्याचा आनंद घ्यायचा ही गोष्ट यांच्याकडून शिकण्यासारखी आहे.”
आणखी वाचा – यामी गौतमने चिमुकल्याला दिला जन्म, मुलाचं नावंही ठेवलं आहे फारस खास, नावाचा अर्थ आहे…
गौरी व तिच्या आजीच्या व्हिडीओला नेटकरी नेहमीच चांगला प्रतिसाद देताना पाहायला मिळतात. दोघी अनेकदा त्यांचे काही विनोदी व विचार करायला लावणारे व्हिडीओ शेअर करत असतात आणि त्यांचे हे व्हिडीओ नेटकऱ्यांच्या पसंतीसही पडतात.
आणखी वाचा – मुलगा झाला हो! यामी गौतम झाली आई, नावही केलं जाहीर, म्हणाली, “आमच्या मुलाच्या”
दरम्यान, गौरी ही सोशल मीडियावर कंटेट क्रिएटर असण्याबरोबरच एक कलाकारही आहे. ती सोशल मीडियावर व्हिडीओ पोस्ट करण्यासह उत्तम स्केच व पेटींगही काढते. ती मुळची मुंबईकर असली तरी कोकणात गावी गेल्यावर तिच्या आजीबरोबरचे व्हिडीओ शेअर करत असते. त्यामुळे या ‘बिनधास्त मुलगी’सह तिची आजीदेखील एक सोशल मीडिया कंटेट क्रिएटर आहे असं म्हटलं तर वावगं होणार नाही.