Reshma Shinde Ganesh Festival : कलाकारांच्या घराचा बाप्पा पाहायची ओढ साऱ्या प्रेक्षक वर्गात अधिक असते. कलाकार मंडळी हा सण कसा साजरा करतात, ते कसे तयार होतात हे पाहण्यास साऱ्यांना आवडतं. अनेक कलाकारांच्या घरी यंदा गणपती बाप्पा विराजमान झाले आहेत. दरम्यान, मराठी सिनेविश्वातील अनेक नवोदित जोडप्यांनी यंदा पहिला गणेशोत्सव साजरा केला आहे. यामध्ये अभिनेत्री रेश्मा शिंदे हिने लग्नानंतरचा पहिला गणेशोत्सव तिच्या सासरी अगदी पारंपरिक अंदाजात आणि थाटामाटात साजरा केला आहे. अभिनेत्रीने याचे खास फोटो तिच्या इंस्टाग्राम अकाउंटवर शेअर केले आहेत.
रेश्मा शिंदे हिने पवनसह लग्नगाठ बांधली. तिच्या लग्नाच्या समोर आलेल्या फोटोंनी तर साऱ्यांना सुखद धक्का बसला. मालिकाविश्वातील हा लोकप्रिय चेहरा आता सासरी मराठी आणि साऊथ अशा दोन्ही पद्धतींनी गणेशोत्सव साजरा करत आहे. रेश्माचे सासर हे साऊथ इंडियन आहे. आणि मराठमोळ्या रेश्माने सासरच्याही पद्धती अत्यंत चोखपणे पार पाडल्या आहेत. लग्नानंतर रेश्माने तिचे प्रत्येक सण नवऱ्यासह अगदी आनंदात साजरे केले.
आणखी वाचा – अंकिता वालावलकरने पार पाडली सूनेची जबाबदारी, माहेरनंतर सासरच्या गणपतीच्या सेवेत रुजू, म्हणाली, “आयुष्यभर…”
आता अभिनेत्री गणेशोत्सवासाठी खास तयार झाली आहे. काठपदरची खास साडी नेसून तिचा पारंपरिक लूक खूपच खास दिसत होता, तर रेश्माच्या नवऱ्याने सोहळ नेसले होते. दोघेही खूपच सुंदर दिसत होते. बाप्पाबरोबरचे फोटो शेअर रेश्माने कॅप्शन देत असं म्हटलं की, “लग्नानंतरचा पहिला बाप्पा. पहिलं पावन आगमन – आनंद, श्रद्धा आणि नव्या सुरुवातीचा मंगलमय क्षण! मोरया”. यावेळी त्यांच्या घरच्या बाप्पा जवळच्या सजावटीनेही साऱ्यांचं लक्ष वेधलं. केळीची पानं आणि फुलांची आरास करत त्यांनी खास सजावट केली.
आणखी वाचा – ऐश्वर्या नारकरांनी स्वतःच्या हाताने बनवले उकडीचे मोदक, गृहिणींना खास टिप्सही दिल्या, व्हिडीओ समोर
रेश्माने २९ नोव्हेंबर २०२४ रोजी पवनसह लग्नगाठ बांधली होती. दोघांचा प्रेमविवाह असून त्यांनी आधी मराठमोळ्या पद्धतीने व नंतर दाक्षिणात्य पद्धातीने अशा दोन्ही पद्धतीने लग्न केलं. त्यावेळी दोघांच्या लग्नाचे फोटो सोशल मीडियावर खूप व्हायरल झाले होते. सध्या रेश्मा ‘घरोघरी मातीच्या चुली’ या मालिकेमुळे चर्चेत आली आहे.
