प्रसिद्ध सहाय्यक अभिनेते आणि कॉमेडियन विश्वेश्वर राव यांचे दीर्घ आजाराने मंगळवार २ एप्रिल रोजी निधन झाले. वयाच्या ६२व्या वर्षी त्यांनी अखेरचा श्वास घेतला. मिळालेल्या माहितीनुसार, विश्वेश्वर राव गेल्या काही वर्षांपासून कर्करोगाशी झुंज देत होते आणि त्यांच्यावर उपचार सुरू होते. मीडियाच्या वृत्तानुसार, त्यांचे पार्थिव त्यांच्या चेन्नईतील सिरसेरी येथील निवासस्थानी जनतेसाठी आणि त्यांच्या सहकाऱ्यांना अंत्यदर्शनासाठी ठेवण्यात आले होते. काल सकाळी त्यांच्यावर अंत्यसंस्कार करण्यात आले. (South Actor Visweswara Rao Death)
विश्वेश्वर राव हे आंध्र प्रदेशातील काकीनाडा येथील होते आणि वयाच्या ६४व्या वर्षी बालकलाकार म्हणून ओळख मिळाल्यानंतर त्यांचे कुटुंब चेन्नईला स्थायिक झाले. त्यांची ‘पिठामगन’ या तामिळ चित्रपटात मंजूच्या वडिलांची (अभिनेत्री लैला) भूमिका नेहमीच आठवणीत राहिली. बाला यांनी लिहिलेला आणि दिग्दर्शित केलेला ‘पिठामगन’ हा चित्रपट बॉक्स ऑफिसवर यशस्वी झाला आणि तमिळनाडू राज्य चित्रपट पुरस्कार, फिल्मफेअर अवॉर्ड्स साऊथ, आणि राष्ट्रीय चित्रपट पुरस्कारही जिंकले.
विश्वेश्वर राव यांनी ३५० तमिळ व तेलुगु चित्रपटांमध्ये विनोदी कलाकाराच्या भूमिकेसाठी विशेष प्रशंसा मिळवली. १५० हून अधिक चित्रपटांमध्ये बालकलाकार म्हणून काम करत त्यांनी प्रेक्षकांची मनं जिंकली. केवळ चित्रपटच नाही, तर विश्वेश्वर राव यांचे कार्य टेलिव्हिजन मालिकांपर्यंतही आहे. त्यांच्या शानदार अभिनय कारकिर्दीत, विश्वेश्वर राव यांना एनटी रामाराव, अक्किनेनी नागेश्वरा राव आणि एमजी रामचंद्रन यांसारख्या अनेक दिग्गज अभिनेत्यांबरोबर स्क्रीन शेअर करण्याची संधी मिळाली.
याशिवाय त्यांनी रजनीकांत, चिरंजीवी, नागार्जुन आणि पवन कल्याण यांसारख्या अभिनेत्यांसह अभिनय केला. अनेक प्रसंगी, विश्वेश्वर राव यांनी एनटीआर, एमजीआर आणि जे जयललिता या तीन मुख्यमंत्र्यांसह काम केल्याबद्दल अभिमान व्यक्त केला.
