प्रसिद्ध कॉमेडियन-अभिनेता लक्ष्मी नारायणन शेषू यांचे वयाच्या ६०व्या वर्षी निधन झाले आहे. दिनांक २६ मार्च मंगळवार रोजी त्यांनी चेन्नईतील एका खासगी रुग्णालयात अखेरचा श्वास घेतला. अभिनेत्याच्या निधनाच्या वृत्तामुळे संपूर्ण दक्षिण भारतीय चित्रपटसृष्टी शोकसागरात बुडाली आहे. दरम्यान सोशल मीडियावर अभिनेत्याच्या चाहत्यांनी त्यांना श्रद्धांजली वाहिली आहे. शेषू यांना १५ मार्च रोजी हृदयविकाराचा झटका आला होता, त्यानंतर त्यांना रुग्णालयात दाखल करण्यात आले होते. (Lakshmi Narayanan Seshu Death)
लक्ष्मी नारायणन शेषू यांना त्यांचे चाहते प्रेमाने लोलू सभा शेषू या नावाने हाक देत. ‘लोलू सभा’ या टीव्ही शोमधून त्याला हे नाव मिळाले. शेषूने धनुषबरोबर २००२मध्ये ‘थुलुवधो इलामाई’ चित्रपटाद्वारे मोठ्या पडद्यावर पदार्पण केले. गेल्या २२ वर्षांच्या चित्रपट कारकिर्दीत त्यांनी २१ चित्रपटांमध्ये काम केले होते. यामध्ये २०२३ मध्ये प्रदर्शित झालेला सुपरहिट तमिळ रोमँटिक व कॉमेडी चित्रपट ‘किक’ देखील समाविष्ट आहे. या चित्रपटात संथानम मुख्य भूमिकेत होता.
शेषू यांना हार्ट अटॅक येण्याआधी आणि ते हॉस्पिटलमध्ये दाखल होण्याच्या काही आठवड्यांपूर्वी मार्चमध्ये टीव्ही शो ‘लोलू सभा’च्या रियुनियन पार्टीमध्ये दिसले होते. अभिनेत्याच्या निधनाच्या वृत्ताला त्याचा मित्र रॅडिन किंग्सले यांनी दुजोरा दिला आहे. रॅडिन किंग्सले यांनी अभिनेत्याचा फोटो सोशल मीडियावर शेअर केला आणि कॅप्शनमध्ये लिहिले आहे की, “तुमच्या आत्म्यास शांती लाभो”.
टीव्हीच्या लोकप्रिय कॉमेडी शो ‘लोलू सभा’मध्ये काम केल्यानंतर या अभिनेत्याला खऱ्या अर्थाने लोकप्रियता मिळाली. त्यानंतरच त्यांना कॉमेडी किंग अशी ओळख मिळाली. शेषूने ‘गुलू गुलू’, ‘ए1’, ‘नई सेकर रिटर्न्स’, ‘डिकिलुना’, ‘द्रौपदी’, ‘अँटी इंडियन’ यांसारख्या हिट चित्रपटांमध्ये काम केले होते. संथानमच्या ‘वडक्कुपट्टी रामासामी’ या चित्रपटांमधून ते अखेरचे पडद्यावर दिसले होते. हा चित्रपट यावर्षी ०२ फेब्रुवारी २०२४ रोजी चित्रपटगृहात प्रदर्शित झाला.