सुप्रसिद्ध कला दिग्दर्शक नितीन देसाई यांनी एनडी स्टुडिओ येथे गळफास घेत आत्महत्या केली. ते ५७ वर्षांचे होते. त्यांच्या अचानक जाण्याने संपूर्ण कलाविश्वाला मोठा धक्का बसला आहे. तसेच त्यांच्या कुटुंबीयांवरही दुःखाचा डोंगर कोसळला आहे. अनेक कलाकार मंडळी नितीन देसाईंच्या निधनानंतर दुःख व्यक्त करताना दिसत आहेत. तर काहींनी त्यांच्याबरोबर काम करण्याचा अनुभव सांगितला आहे. नितीन देसाई यांनी एवढं मोठं टोकाचं पाऊल का उचललं?, आत्महत्येमागचं नेमकं कारण काय? हे अद्यापही अस्पष्टच आहे. पण नितीन देसाई यांच्या आत्महत्येपूर्वी नेमकं काय घडलं? हे आपण जाणून घेणार आहोत.
नितीन देसाई यांच्या निधनाची बातमी ऐकताच त्यांच्या कुटुंबीयांसह कलाकार मंडळींना दुःखद धक्का बसला. आम्ही जवळचा मित्र गमावला, चित्रपटसृष्टीचं मोठं नुकसान झालं अशा भावना कलाकारांनी व्यक्त केल्या आहेत. पण आत्महत्येपूर्वी ते नेमके कुठे होते?, तेव्हा नेमकं काय घडलं? हे समोर आलं आहे. नितीन देसाईंनी एनडी स्टुडिओ उभारण्याचं स्वप्न पाहिलं आणि ते स्वप्न पूर्णही केलं.
एनडी स्टुडिओमध्येच त्यांनी स्वतःसाठी छोटं घर बांधलं होतं. गेल्या दोन दिवसांपासून ते याच घरामध्ये राहत होते. एनडी स्टुडिओ म्हणजे त्यांचं दुसरं घर होतं. आत्महत्येच्या दोन दिवसांपासून ते एनडी स्टुडिओमध्ये बांधलेल्या घरामध्येच राहत होते. ३१ जुलैपर्यंत (सोमवार) त्यांनी आपल्या संपूर्ण टीमला त्यांच्या पुढील प्रोजेक्टबाबत माहिती दिली होती. मात्र आज सकाळपासून त्यांनी एकाही व्यक्तीच्या फोनला प्रतिसाद दिला नाही.
दरम्यान नितीन देसाई यांचा प्रतिसाद न मिळाल्याने कर्मचाऱ्यांनी एनडी स्टुडिओच्या अधिकाऱ्यांना याबाबत माहिती दिली. अधिकाऱ्यांनी नितीन देसाई राहत असलेल्या घराचा दरवाजा तोडला. शिवाय लगेचच त्यांनी या संपूर्ण प्रकाराबाबत पोलिसांना माहिती दिली. आर्थिक अडचणींमुळे नितीन देसाई यांनी हे टोकाचं पाऊल उचललं असल्याची चर्चा सध्या सुरु आहे. मात्र अद्यापही पोलिसांचा तपास सुरु आहे. नितीन देसाई पूर्वी मुलुंड येथे राहत होते. कालांतराने ते पवई येथे स्थायिक झाले. मात्र आता त्यांचं पार्थिव मुलुंड येथील रुग्णालयात ठेवण्यात आलं आहे. २ ऑगस्ट (गुरुवार) रोजी त्यांच्या पार्थिवावर अंत्यसंस्कार करण्यात येतील.