‘तारक मेहता का उल्टा चष्मा’ या विनोदी मालिकेतून घराघरांत पोहोचलेली अभिनेत्री म्हणजे दिशा वकानी. दिशाने या मालिकेत ’दयाबेन’ ही भूमिका अत्यंत चोख पार पाडली. दयाबेन हे पात्र मनोरंजन उद्योगातील सर्वात लोकप्रिय पात्र आहे, असं म्हणणं चुकीचं ठरणार नाही. ‘तारक मेहता का उल्टा चष्मा’ या लोकप्रिय कार्यक्रमाला निरोप देऊनही दिशाचं दयाबेन हे पात्र लाखो लोकांच्या हृदयावर राज्य करत आहे. विशेषतः दिशाच्या चाहत्यांना मालिकेतील तिचा विनोद आणि तिच्या जबरदस्त अशा गरबा मूव्हची आठवण येत आहे यांत शंका नाही. (Disha Vakani Video)
मालिकेतून काढता पाय घेतल्यानंतर दिशा पुन्हा एकदा मालिकेत परतणार असल्याची चर्चा रंगली होती. मात्र दिशा काही मालिकेत परतली नाही. लग्नानंतर, या अभिनेत्रीने अभिनयातून ब्रेक घेतला आणि ती तब्बल ६ वर्ष सिनेसृष्टीपासून दूर गेली. इतकंच नव्हे तर ती सोशल मीडियापासूनही दूर राहिली. त्यानंतर आता बऱ्याच दिवसांनी दिशा वकानी पुन्हा एकदा चर्चेत आली आहे. आता नवरात्र सुरू असल्यानिमित्ताने दिशाने पती व मुलांबरोबर एका कार्यक्रमाला हजेरी लावली. दरम्यान या कार्यक्रमामधील त्यांचे काही व्हिडीओ समोर आले आहेत.
या व्हिडिओमध्ये, दिशा तिचा पती मयूर पडियासह नवरात्रीच्या कार्यक्रमात त्यांच्या मुलांसह पाहायला मिळाली. या कार्यक्रमासाठी दिशाने गोल्डन रंगाचा लेहेंगा घातला होता. त्यावर गुलाबी रंगाची नक्षीदार ओढणी व ब्लाऊज परिधान केला होता. अगदी कमी मेकअप करून तिने केस मोकळे सोडले होते. तसेच दिशाचा पती मयूरने लहान मुलाला कडेवर घेतलं होतं. मयूरने शेरवानी घातली होती. दिशाने पती व मुलांबरोबर देवीचे दर्शन घेतले. दरम्यान दिशा व मयूर दोघेही त्यांच्या मुलांची काळजी घेताना दिसले. दिशाचा नवरा मयूरने त्यांच्या छोट्या मुलाला कडेवर उचलून घेतलं होतं. पिवळ्या रंगाच्या पोशाखात त्यांचा लेक गोंडस दिसत होता. दिशांच्या मुलाची पहिल्यांदाच झलक पाहायला मिळाली.
तर आणखी एका व्हायरल झालेल्या व्हिडिओमध्ये, दिशा तिच्या पती आणि त्यांच्या मुलांसह कार्यक्रमात आरती करताना दिसली. दिशा वकानी आणि तिचा पती, मयूर पडिया यांनी २०१५ साली लगीनगाठ बांधली. त्यानंतर दिशाने दोन वर्ष काम केलं. मात्र पालक होण्याचा निर्णय घेतल्यानंतर दिशाने सिनेसृष्टीपासून काढता पाय घेतला.
