‘नटरंग’, ‘बालगंधर्व’ अशा लोकप्रिय मराठी चित्रपटाचे व ‘ताली’ या हिंदी सीरिजचे दिग्दर्शक रवी जाधव हे मराठी सिनेसृष्टीतील लोकप्रिय दिग्दर्शक आहेत. केवळ मराठीच नव्हे तर हिंदी सिनेविश्वातदेखील त्यांची विशेष लोकप्रियता आहे. त्यांनी फक्त मराठीच नव्हे, तर अनेक हिंदी चित्रपट व वेब सीरिजचं दिग्दर्शन आणि निर्मिती केली आहे. आपल्या दिग्दर्शनातून चर्चेत राहणारे रवी जाधव त्यांच्या सोशल मीडियावरही तितकेच सक्रिय असतात. सोशल मीडियावर ते त्यांचे फोटो व कामाबद्दलची माहिती शेअर करत असतात.
स्वत:च्या फोटोबरोबरच रवी जाधव हे त्यांच्या कुटुंबाबद्दलच्या काही पोस्टही शेअर करत असतात. काही दिवसांपूर्वी रवी यांनी सोशल मीडियावर पोस्ट शेअर करत त्यांचा मुलगा अथर्व जाधवने कॅनडामधून पदवीचं शिक्षण पूर्ण केलं असल्याची माहिती दिली होती. अथर्वबरोबरचे काही फोटो पोस्ट करत रवी जाधव यांनी “माझ्या मुलाने नुकतीच OCAD युनिव्हर्सिटी, कॅनडातून डिजीटल फ्युचर्समध्ये बॅचलर ऑफ डिझाईन (ऑनर्स) पदवी पूर्ण केली” असं म्हटलं होतं.
आणखी वाचा – “अजिंक्य घरी बघत असेल माझी वाट”, शिवानी सुर्वेचा नवऱ्यासाठी हटके उखाणा, लाजत म्हणाली…
अशातच रवी यांनी सोशल मीडियावर अथर्वच्या दीक्षांत समारंभाचा खास व्हिडीओ शेअर करत त्यांच्या आनंदी भावना व्यक्त केल्या आहेत. या पोस्टमध्ये रवी यांनी त्यांच्या लेकाचे कौतुक करत असं म्हटलं आहे की, “आज आम्ही आमच्या मुलाची अतुलनीय कामगिरी साजरी करत असताना आम्हाला अभिमान वाटत आहे. त्याच्या दीक्षांत समारंभात त्याला रंगमंचावर पाहणे हा एक अमूल्य क्षण होता जो आम्ही कायमचा जपत राहू. त्याची मेहनत, समर्पण आणि चिकाटीला खऱ्या अर्थाने फळ मिळाले आहे याबद्दल त्याचे खूप खूप अभिनंदन”.
यापुढे त्यांनी लेकाबद्दल गौरवोद्गार काढत असं म्हटलं आहे की, “या ऐतिहासिक क्षणी त्याच्या चेहऱ्यावरील स्मितहास्य जितके उज्ज्वल होते, तितकेच त्याचे भविष्यही उज्ज्वल आहे आणि तो ते पूर्ण करेल असा आम्हाला विश्वास आहे. त्या सर्व आश्चर्यकारक गोष्टी पाहण्यासाठी आम्ही प्रतीक्षा करू शकत नाही. आम्ही तुझ्यावर खूप प्रेम करतो”. दरम्यान, रवी जाधव यांनी शेअर केलेल्या या पोस्टखाली अनेकांनी रवी जाधव यांच्या लेकाचे म्हणजेच अथर्वचे कौतुक केलं आहे. “अभिनंदन, शुभेच्छा, पुढील वाटचालीबद्दल खूप शुभेच्छा, असाच कायम पुढे जात रहा, खूप मोठा हो” अशा अनेक कमेंट्स करत अथर्वच्या या कामगिरीबद्दल प्रतिक्रिया व्यक्त केल्या आहेत.