Dashavatar Artist Passed Away : कोकण आणि दशावतार हे वेगळंच समिकरण आहे. शेकडो वर्षांची परंपरा असलेली ही लोककला कोकणात अजूनही जपली गेली आहे ती या कलाकारांमुळेच. प्रत्येक दशावतारी कलाकार आपल्या पात्राची तयारी स्वतःच करतो. प्रत्येकाचे संवाद स्वतःचेच असतात. रंगभूषाही स्वतःच केली जाते. रंगभुषेसाठी खडूचे रंग वापरले जातात. समोर जी महिला आपली कला उत्तम प्रकारे सादर करीत आहे खरंतर ती महिला नसून तो एक पुरुष आहे. महत्त्वाची गोष्ट म्हणजे दशावतारी नाटकांत काम करणारे सर्व कलाकार हे पुरुषच असतात. स्त्री भुमिका करणाऱ्या पुरुषांचा मेकअप आणि पेहराव तर खऱ्या स्त्रियांना सुद्धा लाजवेल असा असतो.
केवळ कोकणवासीयांनाच नव्हे तर इतर प्रांतातील लोकांनाही या दशावताराबद्दल अप्रूप असते. पण याच कोकणातल्या एका दशावतारी संघाकडून एक दु:खद बातमी समोर येत आहे. दशावतारी नाटकातील सिंधुदूर्ग जिल्ह्यातल्या कणकवली तालुक्यातील हरकुळ खुर्द येथे राहणाऱ्या प्रशांत रामचंद्र मेस्त्री यांचे निधन झाले आहे. प्रशांत यांनी दशावतारात अनेक स्त्री भूमिका साकारुन अजारामर केल्या. त्यांच्या अचानक निधनाने कोकणात शोककळा पसरली आहे. तसेच कलावंतांमध्येही दु:खद वातावरण निर्माण झाले आहे.
आणखी वाचा – फराह खानला कुक दिलीप कुठे भेटला?, १३ वर्षांपूर्वीच्या भेटीमागचा किस्सा…; अजय देवगणच्या आईशी आहे खास कनेक्शन
शुक्रवारी सकाळी प्रशांत मेस्त्री आपल्या लहानग्या मुलाला अंगणवाडीत सोडून आले. त्यानंतर मित्रमंडळींसोबत गप्पा मारुन घरी आल्यावर त्यांनी आपली टू व्हिलर गाडी धुण्याची इलेक्ट्रिक मशीनची वायर तपासत होते. त्यावेळी त्यांना विजेचा जोरात धक्का बसला अन् ते जागीच कोसळले. त्यांचे मित्र आणि शेजाऱ्यांनी त्यांना कणकवली येथील खाजगी रुग्णालयात नेले. मात्र उपचारापूर्वीच त्यांचे निधन झाल्याने त्यांना मृत घोषित केले. प्रशांत यांच्या पश्चात पत्नी, दोन मुलगे आणि एक मुलगी असा परिवार आहे.
प्रशांत मेस्त्री यांच्या कामाबद्दल बोलायचे झाले तर, त्यांनी दशावतारात स्त्री पात्र गाजवली. दशावतारी खेळातले ते हुकूमी एक्का असल्याचे म्हटले जायचे. सौभद्र, महारथी कर्ण, दौपदी वस्त्रहरण यांसारख्या दशावतारी नाटकांमधल्या त्यांच्या भूमिका गाजल्या.
