बरेचदा कलाकार मंडळींना अनेक गोष्टींमुळे ट्रोलिंगचा सामना हा करावा लागतो. विशेषतः महिला कलाकारांना बरेचदा बॉडी शेमिंगमुळे, तसेच कलाकारांच्या बिकिनी फोटोशूटमुळे बरेचदा ट्रोल केलं जात. ही कलाकार मंडळी कित्येकवेळा ट्रोलर्सला सडेतोड उत्तर देताना दिसतात तर बरेचदा या ट्रोलर्सकडे दुर्लक्ष करतात. अशातच एका मराठमोळ्या अभिनेत्रीने बिकिनी शूटवरुन होणाऱ्या ट्रोलिंगबाबत नुकत्याच दिलेल्या मुलाखतीत भाष्य केलं आहे. (Priya Bapat On Trolling)
अभिनेत्री प्रिया बापटने केलेल्या बिकिनी फोटोशूटवरुन ती बरेचदा नेटकऱ्यांच्या कचाट्यात अडकली आहे. अभिनेत्रीने नुकत्याच ‘आरपार’ या युट्यूब चॅनेलला दिलेल्या मुलाखतीत सोशल मीडिया ट्रोलिंग, बिकिनी फोटोशूट व बोल्ड सीन व त्या बोल्ड सीन वरून वडिलांची आलेली प्रतिक्रिया या बाबत खुलेपणाने भाष्य केलं आहे. प्रिया बापटला ‘सिटी ऑफ ड्रीम्स’मधील बोल्ड सीनबाबत विचारलं असता ती म्हणाली, “त्या बोल्ड सीनपासून ते आता मी ऑस्ट्रेलियात बिकिनी घालून फोटोशूट केलं तेवढ्या काळात मला लोकांचे बरेच अनुभव आले. ‘आमच्या प्रियाने असं नाही करायचं’, ‘आमची प्रिया साडीतच छान दिसते’ अशा अनेक प्रतिक्रिया मला ऐकायला मिळाल्या. ‘सिटी ऑफ ड्रीम्स’च्या त्या बोल्ड सीननंतर तर मला लोकांचं प्रचंड ऐकायला लागलं होतं.
प्रिया पुढे म्हणाली, “आपण समाज म्हणून एखाद्या कलाकाराकडे कलाकार म्हणून पाहिलं पाहिजे. लोक मला आपलं समजतात, त्यांच्या घरातल्यासारखं समजतात ही खूप चांगली गोष्ट आहे.त्या लोकांना मी हेदेखील आवर्जून सांगेन की, माझ्या घरच्यांना या सगळ्याचा अजिबात त्रास होत नाही. माझं हे काम आहे ही गोष्ट त्यांनी समजून घेतली आहे. माझे आई-बाबा, माझा नवरा यांना काहीच अडचण नव्हती. त्या सगळ्यांनी माझ्या कामाचा एक भाग म्हणून या सगळ्या गोष्टी आनंदाने स्वीकारल्या आहेत”
“‘सिटी ऑफ ड्रीम्स’ प्रदर्शित झाल्यावर माझा तो सीन सगळीकडे व्हायरल होत होता. मला ज्या क्षणी ती क्लिप दिसली, तेव्हा मी सगळ्यात आधी बाबांना फोन केला त्यांना सगळी कल्पना दिली. तुम्हाला माझी लाज नाही ना वाटत? असंही मी त्यांना विचारलं. त्यावर माझ्या बाबांनी एका वाक्यात मला उत्तर दिलं. ते म्हणजे हा सगळा तुझ्या कामाचा एक भाग आहे. तू काम म्हणून हे स्वीकारलंस यात आम्हाला काहीच गैर वाटत नाही. तू दुर्लक्ष कर. विसरुन जा” असं प्रिया म्हणाली.
ऑस्ट्रेलियातील बिकिनी शूटबद्दल प्रिया म्हणाली, “माझ्या वडिलांना त्या फोटोचा काहीच प्रॉब्लेम नव्हता. बॉलिवूड-हॉलिवूड चित्रपटातील कलाकारांच्या भूमिकांना तुम्ही पात्र म्हणून बघता आणि हेच काम तुमच्या मराठी मुलीने केलं तर संस्कृती आड का येते? एका मराठी मुलीने साकारलेल्या पात्राचा अभिमान तुम्हाला का वाटत नाही? कोणत्या गोष्टीला महत्त्व द्यायचं हे आपल्या हातात असतं” असंही प्रियाने सांगितलं.
