Poonam Pandey Died at 32 : बॉलीवूड विश्वातून एक धक्कादायक बातमी समोर येत आहे. आपल्या बोल्ड लूक व वादग्रस्त विधानांमुळे सतत चर्चेत असणारी अभिनेत्री पूनम पांडेचं निधन झालं आहे. ती ३२ वर्षांची होती. पूनमच्या निधनानंतर कलाविश्वाला मोठा धक्का बसला आहे. गेल्या काही दिवसांपासून ती कर्करोगाचा सामना करत असल्याची माहितीही समोर आली आहे. पूनमच्या मॅनेजरने तिच्या निधनाबाबत सांगितलं आहे. तिच्या इन्स्टाग्राम अकाऊंटद्वारे एक पोस्ट शेअर करण्यात आली. या पोस्टद्वारे तिचं निधन झालं असल्याचं सांगण्यात आलं. मात्र चाहत्यांना या वृत्तावर विश्वास बसेना. अखेर पूनमच्या टीमनेच याबाबतचा खुलासा केला आहे.
‘इंडिया टुडे’ व ’आजतक’ने पूनमच्या मॅनेजमेंट टीमशी संवाद साधण्याचा प्रयत्न केला. यावेळी त्यांनी घडलेला संपूर्ण प्रकार सांगितला. ते म्हणाले, “गेल्या काही दिवसांपासून पूनमला कर्करोग या आजाराने घेरलं होतं. आणि शेवटच्या स्टेजचा हा कर्करोग होता. दरम्यान युपीमधील तिच्या घरीच ती राहत होती. तिथेच पूनमवर उपचारही सुरु होते. तिच्या पार्थिवावरही तिथेच अंत्यंसंस्कार होणार आहेत. तसेच अधिक माहिती अजूनही समोर आलेली नाही”. सोशल मीडियाद्वारे पूनमला श्रद्धांजली वाहण्यात येत आहे.
पूनमच्या इन्स्टाग्राम पोस्टमध्ये असं नमूद करण्यात आलं आहे की, “आजची सकाळ खूपच निराशाजनक आहे. सांगताना अत्यंत दुःख होत आहे की, सगळ्यांची लाडकी पूनम पांडेला आपण गर्भाशयाच्या कर्करोगामुळे गमावलं आहे. आतापर्यंत तिच्या संपर्कात आलेल्या प्रत्येक व्यक्तीला तिने चांगली व प्रेमळ वागणूक दिली. या दुःखद काळात आमच्या गोपनीयतेचा तुम्ही आदर करा अशी विनंती करतो”.
पूनमची ही पोस्ट पाहून सगळ्यांनाच दुःखद धक्का बसला आहे. ही बातमी खोटी असूदेत असे तिचे चाहते सातत्याने कमेंट करत म्हणत आहेत. तर काहींनी ही बातमी खरी असल्याचं म्हणत श्रद्धांजली वाहिली आहे. २०१३मध्ये ‘नशा’ या चित्रपटाद्वारे पूनमने बॉलिवूडमध्ये पदार्पण केलं. कंगना रणौतच्या ‘लॉकअप’ शोमध्येही ती झळकली. शिवाय सोशल मीडियावर तिचे लाखो चाहते आहेत. पूनमच्या निधनानंतर कलाकार मंडळीही हळहळ व्यक्त करत आहेत.