प्रत्येक कलाकार हा त्याची आवड जोपासत काम करत असतो. अभिनयबरोबरचं बऱ्याच आवडीनिवडी ही कलाकार मंडळी सोशल मीडियावरून चाहत्यांसह शेअर करताना दिसतात. अशातच सर्वांच्या लाडक्या अशा मराठमोळ्या कलाकाराने त्याची चित्रकलेची आवड जोपासली आहे. सुंदर असं बाप्पाचं चित्र काढतानाचा एक व्हिडीओ बिग बॉस विजेता अक्षय केळकरने त्याच्या इंस्टाग्राम अकाऊंटवरून शेअर केला आहे. त्याच्या या पोस्टबरोबरच्या कॅप्शनने साऱ्यांचं लक्ष वेधून घेतलं आहे. (Akshay Kelkar New Post)
बाप्पाचं सुंदर असं चित्र रेखाटत अक्षयने लिहिलं आहे की, “आयुष्यात बाप्पाने मला खूप काही दिलं, सुरुवातीला, लहानपणी, चित्र म्हटलं की मी कायम बाप्पाचं चित्र काढायचो. लॉकडाऊन नंतर मी पुन्हा चित्रं काढायला सुरवात केली. माझ्या सगळ्या आवडत्या देवांची मी चित्र काढली आणि बाकीही बऱ्याच विषयांवर सतत चित्र काढली होतीच. पण जो मला लहानपणापासून सगळं काही देत आला, मोठं झाल्यावर मी त्याचं चित्र काढलंच नाही आणि आज हे पूर्ण केलंय! आणि पोटात खूsssssप मोठा गोळा आलाय. बाप्पाच्या पोटा पेक्षाही खूप मोठा कारण माझ्या आयुष्यातली सगळ्यात मोठी गोष्ट घडणार आहे आणि ती ही त्यानेच दिलीय.”
“आता हे चित्र आयुष्यभर अशा ठिकाणी राहणार जिकडे मी आतापर्यंत बरंच काही पाहिलंय पण आता मात्र मी तिथे नसेन, बाप्पा मी तिथून जाणार आहे आणि तू तिथे असशील. ते माझं होतं. कदाचित यासाठी माझ्या हातून इतकी वर्ष तुला घडायचं नव्हतं का रे ??? तू मला आता जे काही दिलंयस ना ते खूप आहे. काळजी घे तुझी आणि आता तू जिथे असणार आहेस तिथल्या लोकांची, माझी आणि माझ्या लोकांचीही. तुझा अक्षय.” अधिक भावुक पोस्ट अक्षयने शेअर केली आहे.
आणखी वाचा – कार्तिकी गायकवाडच्या ताफ्यात आणखी एका आलिशान कारची भर, कारची किंमत आहे इतकी
अक्षयने शेअर केलेल्या या पोस्टवर अनेक कलाकार मंडळींनी व त्याच्या चाहत्यांनी कमेंट केल्या आहेत. अभिनेत्री सुकन्या मोने यांनी “कित्ती दिवसांनी चित्र काढलं आहेस रे, फार सुंदर… गणपती बाप्पा मोरया!” अशी कमेंट केली आहे. तर अभिनेत्री अपूर्वा नेमळेकरने “वॉव, एकदम भारी भावा” अशी कमेंट केली आहे. अभिनेत्री समृद्धी केळकरने “अक्ष्या” असं कमेंट करत म्हटलं आहे.
