सध्या सिनेसृष्टीतील बरेच कलाकार घर घेतल्याची आनंदाची बातमी चाहत्यांसह शेअर करताना दिसत आहेत. बऱ्याच कलाकारांचं घर घेण्याचं स्वप्न पूर्ण झालं आहे. सोशल मीडियावरून याबाबतची पोस्ट वा फोटो शेअर करून कलाकारांनी ही गुडन्यूज शेअर केली आहे. अशातच आता काही दिवसांपूर्वी एका मराठमोळ्या अभिनेत्याने मुंबईत नवं घर घेतलं असल्याची खुशखबर चाहत्यांसह शेअर केली होती. हा मराठमोळा अभिनेता दुसरा तिसरा कोणी नसून अक्षय केळकर आहे. (Akshay Kelkar New Home)
मराठी ‘बिग बॉस’मुळे अक्षयला विशेष लोकप्रियता मिळाली. सिनेसृष्टीत कुणीही वारसा नसताना केवळ जिद्दीच्या जोरावर अक्षयने स्वतःच स्थान निर्माण केलं. सिनेसृष्टीत पाय घट्ट रोवून उभ्या असणाऱ्या या जिद्दी कलाकाराचं अखेर एक स्वप्न पूर्ण झालं आहे. अक्षयने नुकतंच मुंबईत घर घेतलं आहे. अक्षयने त्याच्या कळव्यातील जुन्या घराला निरोप दिला आहे. हा आनंद त्याने आधीच चाहत्यांसह शेअर केला होता. आता मात्र त्याने त्याच्या नव्या घराची झलक व्हिडिओमधून दाखवली आहे.
अक्षयने त्याच मुंबईत पहिलं स्वतःच घर घेतलं आहे. त्याच्या नवीन घराचा व्हिडीओ शेअर करत त्याने घराची झलक दाखवली आहे. या व्हिडीओखाली कॅप्शन देत त्याने लिहिलं आहे की, “माझं पहिलं घर ते ही मुंबईत. २०२३ मध्ये सगळ्या सुंदर गोष्टी आयुष्यात घडल्या, त्यातली खूप सुंदर व अत्यंत महत्त्वाची गोष्ट म्हणजे, मुंबईत माझं स्वतःच ‘घर’. काही वर्षांपूर्वी जेव्हा या क्षेत्रात काम करायला सुरुवात केली, तेव्हा माझ्या ५ मित्रांबरोबर, म्हाडाच्या बिल्डिंगमध्ये रूम शेअर करून भाड्याने राहत होतो. त्याच म्हाडाच्या मुंबईच्या प्रकल्पामध्ये या वर्षी अर्ज केला होता आणि सोडतीमध्ये विजेता ठरलो” असं त्याने म्हटलं आहे.
यापुढे त्याने लिहिलं आहे की, “स्वप्नवत आहे पण, मला हवा तसा नजारा मिळाला आहे. ज्यातून मी रोज चमकणाऱ्या, धावणाऱ्या मुंबईला पाहू शकतो. सगळी जमवाजमव, कागदपत्र, लोन, तयारी व खूप मोठी किचकट पण हवीहवीशी प्रक्रिया. म्हाडाच्या सर्व अधिकारी आणि कर्मचाऱ्यांना मनापासून धन्यवाद. ही सगळी प्रक्रिया पार पाडताना तुमची खूप मदत मिळाली आणि तुमच्यातला सकारात्मक दृष्टिकोन खरोखर कौतुकास्पद आहे. तुमच्या साथीमुळे घराचा आनंद द्विगुणित झाला. तर, आज माझ्या घराची चावी हातात आली. या वर्षाची सुरुवात व शेवट दोन्ही ‘विजेता’ अशी होते आहे, ही मालिका या पुढे अशीच सदैव सुरू राहू दे. तर अशाप्रकारे, मुंबईत स्वतःच घर झालं. मुंबईत स्वतःचं घर घेतल्याचा खूप आनंद होतोय” असं म्हणत त्याने त्याचा आनंद चाहत्यांसह शेअर केला आहे. त्याच्या या पोस्टवर चाहत्यांकडून अभिनंदनाचा वर्षाव होताना पाहायला मिळत आहे.
