Bigg Boss 17 Latest News : ‘बिग बॉस’ हा कार्यक्रम वादग्रस्त कार्यक्रमांपैकी एक आहे. आतापर्यंत झालेल्या प्रत्येक पर्वाने कायमच प्रेक्षकांचं मनोरंजन केलं आहे. हिंदी ‘बिग बॉस’ नंतर इतर भाषिक ‘बिग बॉस’च्या कार्यक्रमाचीही रंगत प्रेक्षकांमध्ये राहिली. अशातच सध्या हिंदी ‘बिग बॉस १७’ ची सर्वत्र क्रेझ पाहायला मिळतेय. सलमान खान होस्ट करत असलेल्या या ‘बिग बॉस’ने साऱ्यांनाच वेड लावलं आहे. यंदाच्या पर्वात नवनवीन बदल झालेले पाहायला मिळत आहेत. शिवाय स्पर्धकांमध्येही चुरशीची लढाई पाहायला मिळतेय.
सलमान खानच्या या वादग्रस्त शो ‘बिग बॉस १७’ ची सुरुवातच भांडणांपासून झालेली दिसतेय. यंदाच्या पर्वात स्पर्धकांना योग्य संबंध निर्माण करता आले नाहीत, तर काहींनी परस्पर शत्रुत्व स्वीकारायला सुरुवात केली आहे. मालिकाविश्वात लोकप्रिय असलेला अभिनेता नील भट्ट याने देखील ‘बिग बॉस’च्या घरात एन्ट्री केली आहे. मात्र ‘बिग बॉस’च्या घरात त्याचा वावर तितकासा पाहायला मिळत नाही आहे. अशातच एका वादामुळे या शांत स्वभावाच्या नीलचा राग अनावर झालेला पाहायला मिळाला. याची झलक नुकत्याच आऊट झालेल्या प्रोमोमध्ये पाहायला मिळत आहे.
‘बिग बॉस १७’च्या येणाऱ्या भागात शांत स्वभावाच्या नील भट्टचा संताप पाहायला मिळणार आहे. अंकिता लोखंडेचा पती विकी जैन त्याच्या रागाचे कारण ठरला आहे. समोर आलेल्या प्रोमोमध्ये नील विकी जैनबरोबर भांडताना दिसत आहे. यावेळी नीलचा राग अनावर झालेला पाहून इतर स्पर्धक त्याला समजावताना दिसत आहेत. त्यानंतर विकी पुन्हा असं काहीतरी बोलतो ज्यामुळे नीलचा पारा चढतो आणि तो अंकिताच्या नवऱ्याला विकीला मारण्यासाठी धावतो. दरम्यान नीलचा चढलेला पारा पाहून त्याची पत्नी ऐश्वर्याने यामध्ये हस्तक्षेप केला आणि त्याला हे कृत्य करण्यापासून थांबवण्याचा प्रयत्न केला.
नील भट्ट आणि ऐश्वर्या शर्मा शोमध्ये आल्यापासून गोंधळलेले दिसत होते. दरम्यान ‘बिग बॉस’ने त्यांचा हा गोंधळ दूर केला आणि दोघांना घरात होणाऱ्या खेळामध्ये सक्रिय राहण्याचा सल्ला दिला. यानंतर ‘बिग बॉस’ने नीलला घरात तुझा लक्ष्य कोण असेल याबद्दल विचारले. यावर प्रत्युत्तर देत नीलने अंकिता व विकी हे नाव घेतलं. आता नीलला नेमका राग कशाचा आला आहे? याचा खुलासा अद्याप प्रोमोमध्ये करण्यात आलेला नाही. त्यामुळे निल व विकी यांच्यातील वाद नेमका कशामुळे झाला आहे हे पाहणं नक्कीच रंजक ठरणार आहे.