Bigg Boss Marathi 5 : ‘बिग बॉस मराठी’च्या नव्या पर्वाची सध्या सर्वत्र चर्चा सुरु आहे. यंदाच्या ‘बिग बॉस मराठी’च्या नव्या पर्वात एका स्पर्धकाने साऱ्यांचे लक्ष वेधून घेतले आहे. संपूर्ण महाराष्ट्राला भुरळ घालणारा हा स्पर्धक म्हणजेच टिक टॉक स्टार सुरज चव्हाण. सुरजने अल्पावधीतच प्रेक्षकांची मन जिंकत, त्यांच्या हृदयावर राज्य केलं. ‘बिग बॉस मराठी ५’च्या घरात सुरजचा खेळ पाहून सर्वत्र त्याचं कौतुक होताना पाहायला मिळत आहे. खेळ समजला नसला, तरी माणुसकी जपत, सगळ्यांची मनं जपत आणि तोडीस तोड उत्तर देत सुरज स्वतःला ‘बिग बॉस मराठी ५’च्या घरात सिद्ध करताना दिसतोय. (Bigg Boss Marathi 5 Suraj Chavan)
सूरजच्या साध्या भोळ्या स्वभावावर संपूर्ण महाराष्ट्र फिदा आहे असं म्हटलं तर वावगं ठरणार नाही. छोट्याशा खेडेगावातून आलेल्या सुरजने झगमगाटीच्या दुनियेत स्वतःचं असं स्थान स्वतः मिळवलं आहे. सध्या ‘बिग बॉस मराठी ५’मुळे सुरज भलतात चर्चेत आलेला पाहायला मिळतोय. ‘बिग बॉस’च्या घरात सूरजने अनेक साध्या सोप्या गोष्टी केल्या आहेत, पण त्यांच्या याच कृतीचे अनेकांकडून कौतुक झालं आहे. मराठी मनोरंजन विश्वातील अनेक कलाकारांकडून तसंच या घरातील अनेक माजी स्पर्धकांकडून त्याचे कौतुक झालं आहे आणि आता तर त्याला या क्षेत्रातील नसलेल्या व्यक्तींकडूनही पाठींबा मिळत आहे. वारकरी सांप्रदायातून सूरजला पाठींबा मिळत असून त्याच्या खेळाचे कौतुक होत आहे.
सोशल मीडियावर सध्या एक व्हिडीओ व्हायरल होत आहे, ज्यात एक कीर्तनकार सूरजच्या खेळाचे कौतुक करत असल्याचे पाहायला मिळणार आहे. या व्हिडीओनध्ये कीर्तनकार असं म्हणतात की, “‘बिग बॉस’ चांगलं की वाईट हा प्रश्न बाजूला ठेवा. पण इथे बसलेल्या सर्वांना एक वाक्य सांगतो आयुष्यात कधीही आत्महत्येचा विचार मनात आला तर त्या गोलीगत सूरज चव्हाणकडे पाहा आणि कोरोना काळात स्वत:ला संपल्याची जाणीव ज्याला झाली होती टॉप डीपी म्हणजेच धनंजय पोवार आठवून पाहा. वडील गेले तेव्हा सूरज गोट्या खेळत होता. तेव्हा लोकांनी त्याला येऊन सांगितलं की, तुझे वडील गेले. त्यानंतर त्याने गोट्या तशाच खिशात टाकल्या आणि बापाचं शेवटचं तोंड पाहिलं. बिचाऱ्याला तेव्हा काही कळतही नव्हतं. त्यानंतर आईच्या उपचाराला पैसे मिळाले नाहीत म्हणून त्याने सगळ्यांकडे पैसे मागितले. तेव्हा खोकून खोकून आई गेली पण तो काही करु शकला नाही”.
यापुढे त्याने असं म्हटलं की, “फक्त गणपती बसवायचा म्हणून सूरज तीन दिवस कामाला गेला आणि काबाडकष्ट केले. गणपतीपुरते पैसे जमा केले. पण वेड्याबरोबर काय राहायचं म्हणून गावातल्यांपैकी कुणी गणपती बसवायला आलं नाही. पण त्याने एकट्याने गणपती बसवला आणि त्याच गणपती बाप्पाचा आशीर्वाद पाहा. त्याच्यामुळे ‘बिग बॉस’ पहिल्या नंबरवर आहे. त्यामुळे जेव्हा जेव्हा जीवन संपल्याची जाणीव होईल तेव्हा एकदा ‘बिग बॉस’मधील हे दोघे आठवून पाहा. कारण या घरात सर्वांना भांडताना पाहिले पण सूरज एकटा झाडू मारताना दिसला”.
