Bigg Boss Marathi 5 : ‘बिग बॉस मराठी’च्या घरात आता ८ व्या आठवड्याला सुरुवात झाली आहे. ‘बिग बॉस मराठी’च्या पाचव्या पर्वाला सुरू होऊन आता जवळपास ५० दिवस पूर्ण झाले आहेत आणि या घरातील खेळ आता आणखीनच रोमांचक होत चालला आहे. आठवा आठवडा सुरु होताच आता ही स्पर्धा दिवसेंदिवस कठीण होत चालली आहे. नुकताच भाऊच्या धक्क्यावर वैभवने घराचा निरोप घेतला. तर, आर्याला निक्कीला कानशिलात लगावल्याप्रकरणी निष्कासित करण्यात आलं. यामुळे गेल्या आठवड्यात २ जण बेघर होऊन आता घरातील उर्वरित १० सदस्यांमध्ये ‘बिग बॉस’चा पुढचा खेळ रंगणार आहे. वैभव बाहेर गेल्याने आता ‘टीम ए’ पूर्ण कोलमडून गेली आहे. (Bigg Boss Marathi 5 New Promo)
एकीकडे जान्हवीने आधीच या ग्रुपबरोबर संबंध तोडले आहेत. तर दुसरीकडे वैभवही या घरातून बाहेर गेला आहे. त्यामुळे आता ‘टीम ए’मधील फक्त निक्की व अरबाज हे दोघेच टीम म्हणून खेळ खेळताना पाहायला मिळत आहेत. सोमवारच्या भागात ‘बिग बॉस’ने टीम आखून दिल्यामुळे जान्हवी अरबाज व निक्की यांच्याबरोबर खेळली असली तरी तिने स्वत: स्वतंत्र गेम खेळणार असल्याचे बिग बॉसची कॅमेऱ्यात सर्वांना सांगितले आहे. त्यामुळे आता निक्की व अरबाज या दोघांचीच टीम असल्याचे दिसत आहे. अशातच एक नवीन प्रोमो समोर आला आहे ज्यात पॅडी व अभिजीत त्यांच्याबद्दल गॉसिप करतानाचे पाहायला मिळत आहे.
आणखी वाचा – 18 September Horoscope : मंगळवारच्या चंद्रग्रहणाचा कोणत्या राशीच्या लोकांवर काय परिणाम होणार? जाणून घ्या…
नुकत्याच आलेल्या या नवीन प्रोमोमध्ये अभिजीत पॅडी यांना असं म्हणतो की, “अरबाज यावेळी जाऊ शकतो. निक्कीबरोबर गुळूगुळू करण्यातच त्याचा वेळ जातो. टास्कपुरता बाहेर येतो आणि टास्क झाला की आपल्या गुहेत जाऊन बसतो. सिंह जसा शिकरीला न जाता सिंहीणीकडून शिकार करून घेतो तसं तो करत आहे”. त्यामुळे अभिजीतने अरबाजला सिंह म्हटलं असलं तरी घाबरा व टास्कपुरता गेम खेळणारा सिंह म्हटलं आहे. त्याचबरोबर त्याने अरबाज या आठवड्यात बाहेर जाऊ शकतो असंही म्हटलं आहे. त्यामुळे अभिजीतच्या म्हणण्याप्रमाणे अरबाज बाहेर जाणार का? हे आगामी भागात पाहायला मिळणार आहे.
आणखी वाचा – Bigg Boss Marathi मधील नॉमिनेशन टास्कमध्ये टीम A बाद, ‘हे’ सदस्य झाले थेट नॉमिनेट, कोण जाणार घराबाहेर?
दरम्यान, थेट नॉमिनेटेड सदस्यांमध्ये अरबाजचाही समावेश आहे. या नॉमिनेशनच्या टास्कच्या नियमानुसार कमी पॉईंट्स मिळाल्याने ‘टीम ए’थेट नॉमिनेट होते. यात निक्की, अरबाज, जान्हवी, वर्षा आणि सूरज असे पाच सदस्य थेट नॉमिनट झाले आहेत. आता यांच्यापैकी कोण घरात राहणार? आणि कोण बाहेर जाणार? हे आठवड्याच्या शेवटी प्रेक्षकांना पाहायला मिळणार आहे.
