सुप्रसिद्ध अभिनेत्री सना मकबुल गेल्या काही दिवसांपासून गंभीर आजाराचा सामना करत आहे. काही दिवसांपूर्वी तिने रुग्णालयातील उपचारादरम्यानचा फोटो शेअर करत चाहत्यांना याबाबत माहिती दिली होती. आता सनाने तिच्या आजाराबाबत स्पष्टपणे सांगितलं आहे. लिव्हर संबंधित आजाराचा सना सामना करत आहे. गरज पडल्यास लिव्हर ट्रान्सप्लांट तिला करावं लागणार आहे. मात्र ते होऊ नये यासाठी सना देवाकडे प्रार्थना करत आहे. गंभीर आजाराचा हिंमतीने सामना करण्यासाठी स्वतःचीच समजूत काढत आहे. याचविषयी सनाने आता भाष्य केलं आहे. (sana makbul suffer from liver disease)
सनाने म्हटलं की, “मी गेल्या काही काळापासून ऑटोइम्युन हेपेटायटिस आजाराने ग्रस्त आहे. काही दिवसांपासून माझी तब्येत आणखीनच बिघडली आहे. लिव्हरची रोगप्रतिकारक शक्तीही आता पूर्णपणे कमी झाली आहे. त्यानंतर लिव्हर सिरोसिसचं मला निदान झालं आहे. पण या संपूर्ण प्रसंगाचा मी हिंमतीने सामना करत आहे”. सना तिला झालेल्या गंभीर आजाराला मोठ्या हिंमतीने सामोरी जात आहे. तसेच अचानक आजाराचे निदान झाल्यानंतर तिचं शरीरही कमकूवत झालं आहे. सना तिची रोगप्रतिकारक शक्ती वाढवत आहे.
सनाने हिंदुस्तान टाइम्सला दिलेल्या मुलाखतीत म्हटलं की, “लिव्हर ट्रान्सप्लांटपासून दूर राहण्याचाच डॉक्टर आणि मी प्रयत्न करत आहे. लिव्हर ट्रान्सप्लांट आम्हाला करायचं नाही. इम्युनथेरपीही मी सुरु केली आहे. यामध्ये मला खूप थकवा येतो. लिव्हर ट्रान्सप्लांट माझ्याबाबतीत होऊ नये एवढीच माझी इच्छा आहे. त्यासाठी मी प्रयत्न करत आहे. हे अजिबात सोप नाही. पण इतक्या लवकर मी हार मानणार नाही”.
पुढे ती म्हणाली, “काही दिवस मी रडते तर काही दिवस मी हसत असते. पण प्रत्येक दिवशी मी यामधून बाहेर पडण्यासाठी खूप प्रयत्न करते”. आजारामुळे सना पूर्णपणे खचली आहे. पण त्यातही ती स्वतःची समजूत काढत आहे. हिंमतीने नव्याने उभं राहण्याचा प्रयत्न करत आहे. आजारपणामुळे तिची सुरु असलेली अनेक कामं रखडली आहेत. क्षणात सगळी कामं थांबली. काम मिळवण्यासाठी बरीच वर्ष मेहनत केली. पण आता हाती यश आल्यानंतर आजारपण आल्यामुळे सना पूर्णपणे ढासाळली आहे.
