Soham Bandekar’s dog Simba passes away : मराठी मनोरंजनसृष्टीतील प्रसिद्ध बांदेकर कुटुंब नेहमीच विविध कारणांनी चर्चेत असतात. नुकतेच अभिनेता आदेश बांदेकर आणि अभिनेत्री सुचित्रा बांदेकर यांचा मुलगा सोहम बांदेकर याचा विवाह ‘येडं लागलं प्रेमाचं’ या लोकप्रिय मालिकेतील अभिनेत्री पूजा बिरारी हिच्यासह पार पडला. या लग्नसोहळ्याची चर्चा केवळ सोशल मीडियापुरती मर्यादित राहिली नाही, तर संपूर्ण मराठी मनोरंजनसृष्टीत या लग्नाची मोठी चर्चा रंगली होती. लग्नाआधीचे विधी, हळद, मेहंदीपासून ते भव्य रिसेप्शनपर्यंतचे फोटो आणि व्हिडीओ सोशल मीडियावर मोठ्या प्रमाणात व्हायरल होताना दिसले.
मात्र, आता बांदेकर कुटुंबावर एक दुःखद प्रसंग ओढावला आहे. बांदेकर कुटुंबातील लाडका श्वान सिंबा याचं निधन झालं आहे. सिंबा हा सोहम बांदेकरचा केवळ पाळीव प्राणी नव्हता, तर त्याच्या आयुष्यातील एक महत्त्वाचा भाग होता. सिंबा जवळपास १७ वर्षांचा होता आणि सोहमच्या आयुष्यात तो त्याचा खरा साथीदार होता. विशेष म्हणजे, सोहमची पत्नी पूजा बिरारी हिलाही सिंबाबद्दल खूप प्रेम होतं. त्यांच्या मेहंदी समारंभात पूजाने तिच्या हातावर सिंबाचं चित्र काढून घेतलं होतं, ज्यामुळे या दोघांचं सिंबा वर असलेलं प्रेम स्पष्टपणे दिसून आलं होतं.
आणखी वाचा – “छबील-गोदोची आई आली…”, क्रांती रेडकरची ओळख नेमकी कशी आहे?, स्वतःच म्हणाली, “वानखेडेंची बायको…”
सिंबाच्या निधनाची बातमी स्वतः सोहम बांदेकर यांनी सोशल मीडियावरील एका भावनिक पोस्टद्वारे शेअर केली आहे. सिंबाचा फोटो शेअर करत त्यांनी लिहिलं आहे की, “माझ्या आयुष्यातील २८ वर्षांपैकी जवळपास १७ वर्षे माझा साथीदार, माझा रूममेट, माझा आधारस्तंभ, माझा समुपदेशक, माझा सर्वात मोठा पाठिंबा आणि माझ्या आयुष्यातील प्रेम आता माझ्यासोबत नाही. त्याने हा प्रवास सोडून देवांच्या सान्निध्यात जाण्याचा निर्णय घेतला आहे. मिळालेल्या प्रत्येक नि:स्वार्थ आणि निखळ प्रेमाबद्दल मनापासून धन्यवाद. तू नेहमीच आमच्यासोबत असशील.”
आणखी वाचा – मुलगा झाला हो! भारती सिंह दुसऱ्यांदा झाली आई, गोंडस मुलाला दिला जन्म
याच पोस्टमध्ये सोहमने चाहत्यांचेही आभार मानले आहेत. “सिंबावर तुम्हा सगळ्यांनी भरभरुन प्रेम केलं. प्रत्यक्ष भेट न झाली तरी तुमचं प्रेम आणि जिव्हाळा त्याला नेहमी जाणवत राहिला. यासाठी आम्ही सर्वांचे मनापासून आभार मानतो” असं भावनिक शब्दांत त्याने म्हटलं आहे. सिंबाच्या निधनामुळे बांदेकर कुटुंबावर शोककळा पसरली असून, अनेक चाहते आणि कलाकार मंडळी सोशल मीडियाच्या माध्यमातून सोहम आणि बांदेकर कुटुंबीयांना धीर देत आहेत.
