रंगभूमीचा रुपेरी पडदा, चित्रपटाची सोनेरी स्क्रीन किंवा अगदी टीव्हीच्या लहान स्क्रीन अशा मनोरंजनाच्या अनेक माध्यमांत आपली मुशाफिरी करणारे बहुरूपी अभिनेते म्हणजे म्हणजे अशोक सराफ. गेल्या पाच दशकांकडून अधिक काळ त्यांनी मराठी सोबतच हिंदी प्रेक्षकांचेही मनोरंजन केले. या काळात त्यांनी ३०० हून अधिक सिनेमांमध्ये काम करून प्रेक्षकांच्या मनात अढळ निर्माण केले. त्यांचे चाहते त्यांना प्रेमाने अशोक मामा असं म्हणतात. अशोक मामांचा आज ७७ वा वाढदिवस आहे.
आपल्या अभिनयाच्या जोरावर मराठीसह हिंदी सिनेविश्वातही त्यांनी आपल्या अभिनयाचा ठसा उमटवला आहे. मनोरंजन सृष्टीतील त्यांच्या या योगदानासाठी त्यांना यंदाचा ‘महाराष्ट्र भूषण’ हा अत्यंत मानाचा समजला जाणारा पुरस्कार जाहीर करण्यात आला. यावेळी ‘इट्स मज्जा’ने अशोक सराफ यांच्या घरी जाऊन त्यांचे अभिनंदन केले होते. यावेळी पत्नी निवेदिता सराफ यांनी अशोक सराफ यांचे औक्षण केले. तसेच यावेळी अशोक सराफ यांची मोठी बहीणही त्यांच्या घरी उपस्थित होती.
‘महाराष्ट्र भूषण’ पुरस्कार मिळताच अशोक सराफ यांच्या अनेक चाहत्यांमध्ये आनंदाचं वातावरण पाहायला मिळालं. यावेळी अशोक सराफ यांनी केलेल्या कृतीचे खूपच कौतुक झालं. या खास क्षणाला अशोक सराफ यांनी त्यांच्या आई-वडिलांचेही आशीर्वाद घेतले. पत्नीसह त्यांनी आई वडिलांच्या फोटोला हार घालत त्यांचे आशीर्वाद घेतले. शिवाय अशोक सराफांनी स्वामीं समर्थांच्या फोटोला हार घालत स्वामींचेही आशीर्वाद घेतले.
अशोक सराफांचा हा व्हिडीओ सध्या सोशल मीडियावर व्हायरल होत असून या व्हिडीओला अनेकांनी लाईक्स व कमेंट्स करत चांगलाच प्रतिसाद दिला आहे. त्याचबरोबर या व्हिडीओखाली चाहत्यांनी अशोक सराफ यांना वाढदिवसानिमित्त शुभेच्छा दिल्या आहेत. तसेच अनेकांनी या व्हिडीओखाली “श्री स्वामी समर्थ” अशाही अनेक कमेंट्स केल्या आहेत.
दरम्यान, अशोक सराफ यांना यांना काही दिवसांपूर्वीच ‘महाराष्ट्र भूषण’ या मानाच्या पुरस्काराने सन्मानित करण्यात आले. तसेच त्यांना यावर्षीचा ‘झी मराठी जीवनगौरव पुरस्कार’देखील मिळाला. त्याचबरोबर नुकताच त्यांना ‘मास्टर दीनानाथ मंगेशकर प्रदीर्घ नाट्यसेवा पुरस्कार’ व नाट्य परिषदेचाही ‘जीवन गौरव पुरस्कार’ देण्यात आला आहे.
