बॉलिवूडच्या आणखी एका चित्रपटाने या वर्षाच्या सरते शेवटी बॉक्स ऑफिसवर तुफान आणलं आहे. संदीप रेड्डी वांगा दिग्दर्शित ‘अॅनिमल’ चित्रपट सध्या बॉक्स ऑफिसवर चांगलाच गाजत आहे. पहिल्याच दिवशी या चित्रपटाने बंपर कमाई केली. शुक्रवारी १ डिसेंबरला प्रदर्शित झालेल्या या चित्रपटाने पहिल्याच दिवशी ताबडतोड कमाई करत या वर्षीचा सर्वात मोठा ओपनिंग कमाई करणारा दुसरा चित्रपट ठरला आहे. या चित्रपटाच्या ट्रेलरने प्रेक्षकांची उत्सुकता वाढवली होती. अभिनेता रणबीर कपूर, बॉबी देओलचा या चित्रपटातील लूक तर चाहत्यांसाठी आश्चर्याचा धक्काच होता. त्यामुळे या चित्रपटाची उत्सुकता आणखीनच वाढली. सुरुवातीपासूनच या चित्रपटाचं क्रेझ अॅडव्हान्स बुकिंगमधून दिसत होतं. त्यामुळे या चित्रपटाने पहिल्याच दिवशी ताबडतोड कमाई केली आहे. (Animal movie box office collection)
पहिल्याच दिवशी चित्रपटगृहाबाहेर प्रेक्षकांची बरीच गर्दी पाहायला मिळाली. या चित्रपटाने पहिल्याच दिवशी अपेक्षेपेक्षा जास्त कमाई केली असल्याचं पाहाया मिळत आहे. रणबीरचा ‘ब्रह्मास्त्र’ हा चित्रपट त्याच्या आयुष्यातील सर्वाधिक कमाई करणारा चित्रपट ठरला होता. त्याने पहिल्या दिवशी ३६.४२ कोटींची कमाई केली होती. मात्र त्याच्या ‘अॅनिमल’ चित्रपटाने या वर्षीच्या ‘पठान’ व ‘गदर २’ या चित्रपटांना मागे टाकत नवं रेकॉर्ड बनवलं आहे. Sacnilk यांच्या रिपोर्टनुसार, ‘अॅनिमल’ चित्रपटाने शानदार ६१ करोडची अॅडव्हान्स बुकिंग केली आहे. एनसीआरमध्ये या चित्रपटाने सर्वाधिक कमाई केली आहे.
चित्रपटाने जगभरात पहिल्याच दिवशी १०० कोटींचा आकडा पार केला. यावर्षी प्रदर्शित झालेल्या बंपर चित्रपटांमधील ‘पठाण’ने पहिल्या दिवशी भारतात ५७ कोटींची कमाई केली होती. या चित्रपटाने जगभरात १०४.८० कोटींची कमाई केली होती. सनी देओलच्या ‘गदर २’ ने पहिल्या दिवशी देशभरात ४०.१ कोटींची कमाई केली होती.
या चित्रपटातील रणबीरचा अवतार सर्वांना चकित करणारा ठरला. यापूर्वी तो कधीच अशा भूमिकेत दिसला नव्हता. बॉबीची या चित्रपटातील भूमिकादेखील प्रेक्षकांचं लक्ष वेधून घेताना दिसत आहे. हा चित्रपट गुरुवारी ३० नोव्हेंबला अमेरिकेत प्रदर्शित झाला. उत्तर अमेरिकेत त्याने ८.३ कोटींची कमाई करून तिथे सर्वाधिक कमाई करणाऱ्या हिंदी चित्रपटाचा विक्रम केला असल्याचं बोललं जात आहे. भारताच्या विविध भागात या चित्रपटाचं प्रचंड क्रेझ पाहायला मिळत आहे. ‘कबीर सिंह’ व ‘अर्जुन रेड्डी’ यांसारखे चित्रपट बनवणाऱ्या संदीप रेड्डी वंगा यांची दक्षिणेत प्रचंड क्रेझ असल्याचं स्पष्ट होत आहे. संपूर्ण जगाला सध्या या चित्रपटाने वेड लावलं असल्याचं म्हटलं तरी चुकीचं ठरणार नाही.
