Anant Ambani-Radhika Merchant Pre Wedding in Jamnagar : प्रसिद्ध उद्योगपती मुकेश अंबानी व नीता अंबानी यांच्या घरी सध्या लग्नाची लगबग सुरु आहे. अंबानींचा धाकटा मुलगा अनंत अंबानी लवकरच राधिका मर्चंटबरोबर विवाहबंधनात अडकणार आहे. लग्नाच्या काही दिवस आधी जामनगरध्ये प्री-वेडिंग फंक्शन्सचे आयोजन केले गेले आहे. १ ते ३ मार्चपर्यंत या प्री-वेडिंग फंक्शन्सचे आयोजन करण्यात आले आहे. अशातच जामनगरमध्येच अंबानी कुटुंबाच्या वतीने अन्नसेवेचे आयोजन करण्यात आले.
जामनगरमधील रिलायन्स टाउनशिपजवळील जोगवाड गावात ग्रामस्थांसाठी अन्नसेवेचेअययोज करण्यात आले होते. यावेळी तब्बल ५१ हजार स्थानिक लोकांसाठी या अन्नसेवेचे आयोजन करण्यात आले होते. जे पुढील काही दिवस सुरू राहणार आहे. अनंत अंबानी व राधिका मर्चंट यांच्या लग्नाआधीच्या सेलिब्रेशनसाठी अंबानी कुटुंबांनी स्थानिकांचे आशीर्वाद घेतले. तसेच भोजनानंतर उपस्थितांनी पारंपरिक लोकसंगीताचाही आस्वाद घेतला. प्रसिद्ध गुजराती गायक कीर्तिदान गढवी यांनी आपल्या गायनाने उपस्थितांचे मनोरंजन केले.
या अन्नसेवा कार्यक्रमात मुकेश अंबानींनी स्वत:च्या हाताने अन्नदान केले. मुकेश अंबानींनी स्वत:च्या हाताने गोड पदार्थ वाढले. तसेच यावेळी त्यांनी गावकऱ्यांची विचारपुसही केली. यावेळी कुणी राधिका व अनंत यांना आशीर्वाद देताना दिसले, तर कुणी त्यांना भेटवस्तूही दिल्या. दरम्यान, एका व्यक्तीने घरी बनवलेले अन्नही आणले, जे विशेषतः मुकेश अंबानींसाठी होते. तसेच या सोहळ्यात मुकेश अंबानींनी सर्वसामान्यांप्रमाणेच जेवणाचा आस्वाद घेतला. मुकेश अंबानी हाताने खाताना दिसले आणि त्यांनी त्या व्यक्तीच्या जेवणाचे कौतुकही केले. हातात खाद्यपदार्थ घेऊन ते इतर लोकांशी बोलतानाही दिसत होता. त्यांचा अन्नदान करतानाचा हा व्हिडिओ समोर आला असून सोशल मीडियावर हा व्हिडीओ सध्या व्हायरल होत आहे.
या व्हिडीओखाली कमेंट्समध्ये अनेकांनी मुकेश अंबानींच्या या कृतीचे कौतुक केले आहे. त्याचबरोबर अनेकांनी या संपूर्ण कार्यक्रमासाठी त्यांना शुभेच्छाही दिल्या आहेत. दरम्यान, गेल्यावर्षी १९ जानेवारीला अनंत-राधिकाचा साखरपुडा थाटामाटात पार पडला होता. यानंतर वर्षभराने आज त्यांच्या प्री-वेडिंग सोहळ्याची चर्चा रंगली आहे. प्री-वेडिंगनंतर येत्या १२ जुलैला या दोघांचा मुंबईत शाही विवाहसोहळा पार पडणार आहे.
