अनंत अंबानी व राधिका मर्चंट यांच्या लग्नाचा दिवस हळूहळू जवळ येत आहे. १२ जुलै रोजी हे जोडपं लग्नबंधनात अडकणार आहे. त्याआधीच या दोघांच्या लग्नाचे कार्यक्रम सुरु झालेले पाहायला मिळाले. त्यांच्या लग्नातही देश-विदेशातील अनेक दिग्गज व्यक्तींना पाहता येणार आहे. मात्र, या लग्नापूर्वी अंबानी कुटुंबाने सामूहिक विवाहाचा कार्यक्रम आयोजित केला होता. यावेळी अनेक जोडपी विवाहबद्ध झाली. या विवाहसोहळ्याचे खास फोटोही समोर आले आहेत. (Ambani Family Is Getting Mass Wedding)
अंबानी कुटुंबाने गरीब कुटुंबातील लोकांसाठी सामूहिक विवाह कार्यक्रम आयोजित केला होता. या कार्यक्रमात अंबानींचे संपूर्ण कुटुंब सहभागी झाले होते. ४.३० वाजता या कार्यक्रमाला सुरुवात झाली. ‘रिलायन्स कॉर्पोरेट पार्क, ठाणे’ येथे या कार्यक्रमाचे आयोजन करण्यात आले होते. अंबानी परिवाराने आयोजित केलेल्या कार्यक्रमात सुमारे ८०० लोक उपस्थित होते.
या कार्यक्रमाचा शुभारंभ करताना अंबानी कुटुंबाने लग्नाच्या हंगामात देशभरात अशा शेकडो विवाहांचे आयोजन करण्याचे वचन दिले. या सोहळ्यात स्वत: नीता अंबानी व मुकेश अंबानीही उपस्थित होते. याशिवाय इशा अंबानी तिच्या पतीसह हजर असलेली दिसली. इतकंच नव्हे तर अंबानी परिवार या सोहळयाला उपस्थित होता. नीता अंबानी या खास कार्यक्रमासाठी लाल रंगाच्या साडीत पोहोचल्या होत्या. त्यांनी यावेळी साडीला मॅचिंग अशी पर्सही घेतली होती. साडीबरोबरच नीता अंबानी यांनी यावेळी खास हेअरस्टाईलही केली होती.
नीता अंबानी यांनी समारंभात उपस्थित जोडप्यांना आशीर्वाद व शुभेच्छा दिल्या. अंबानी कुटुंबाने प्रत्येक जोडप्याला मंगळसूत्र, लग्नाच्या अंगठ्या आणि नाकातील अंगठी यासह सोन्याचे दागिने दिले. या काळात नववधूंना पैंजण व पायातील जोडवीही दिल्या. प्रत्येक वधूला तिचे ‘स्त्रीधन’ म्हणून १.०१ लाख रुपयांचा धनादेशही देण्यात आला. याशिवाय प्रत्येक जोडप्याला वर्षभर टिकेल एवढा किराणा सामान आणि घरगुती वस्तूही भेट देण्यात आल्या. यामध्ये भांडी, गॅस शेगडी, मिक्सर, पंखा इत्यादी ३६ जीवनावश्यक वस्तू तसेच गादी व उशी यांचा समावेश आहे. समारंभानंतर सर्व लोकांसाठी भव्य डिनरचेही आयोजन करण्यात आले आहे.
