69th National Film Awards Ceremony Updates in Marathi : यंदाच्या ६९व्या राष्ट्रीय चित्रपट पुरस्कारांची घोषणा २४ ऑगस्ट रोजी करण्यात आली होती. त्यानंतर आता या पुरस्कार प्रदान सोहळ्याच्या सादरीकरणाचा समारंभ आज विज्ञान भवन, नवी दिल्ली येथे आयोजित करण्यात आला आहे. राष्ट्रपती द्रौपदी मुर्मू यांच्या हस्ते पुरस्कार विजेत्यांना सन्मानित करण्यात येत आहे. या सोहळ्यासाठी अनेक चित्रपट दिग्गज उपस्थित आहेत.
यंदाच्या ६९व्या राष्ट्रीय पुरस्कार सोहळ्यासाठी अनेक नामांकने जाहीर करण्यात आली होती. दरम्यान सर्वोत्कृष्ट अभिनेत्री म्हणून ‘गंगुबाई काठियावाडी’ या चित्रपटातील गंगुबाई हे पात्र साकारणाऱ्या अभिनेत्री आलिया भट्ट हिला पुरस्कार मिळाला असल्याची घोषणा झाली. त्यावेळी आलियावर अभिनंदनाचा वर्षाव झाला. चित्रपट, साहित्य व कला क्षेत्रात सर्वोत्कृष्ट व उल्लेखनीय कामगिरी करणाऱ्या कलाकारांना भारत सरकारकडून हे पुरस्कार आज प्रदान करण्यात आले आहेत.
दरम्यान, या पुरस्कार सोहळयाला अभिनेत्री आलिया भट्ट हिने पती रणवीर कपूरसह हजेरी लावली. आलियाला नुकताच ६९व्या राष्ट्रीय पुरस्कार सर्वोत्कृष्ट अभिनेत्री म्हणून राष्ट्रपती द्रौपदी मुर्मू यांच्या हस्ते प्रदान करण्यात आला. यावेळी आलियाचा ग्लॅमरस अंदाज पाहायला मिळाला. या भव्य पुरस्कारासाठी आलियाने तिच्या लग्नाच्या साडीची निवड केली आहे. थेट लग्नातली साडी नेसून आलिया भट्टने राष्ट्रीय पुरस्कार स्वीकारला.
‘गंगुबाई काठियावाडी’ चित्रपटातील गंगुबाई या भूमिकेसाठी आलियाला सर्वोत्कृष्ट अभिनेत्री हा पुरस्कार देऊन सन्मानित करण्यात आले. तर आलियासह ‘मिमी’ या चित्रपटाकरिता अभिनेत्री क्रिती सॅनॉन हिला देखील सर्वोत्कृष्ट अभिनेत्रीचा पुरस्कार देऊन सन्मानित करण्यात आलं. तर सर्वोत्कृष्ट अभिनेता हा पुरस्कार ‘पुष्पा’ चित्रपटातील अभिनेता अल्लू अर्जुन याला देऊन सन्मानित करण्यात आलं. या पुरस्कार सोहळ्याला अल्लू अर्जुनने पत्नीसह हजेरी लावली होती.