ज्येष्ठ अभिनेते, लेखक दिलीप प्रभावळकर यांचं गाजलेलं ‘चुकभूल द्यावी घ्यावी’ हे नाटक पुन्हा रंगभूमीवर येण्यास सज्ज होत आहे. या नाटकादरम्यान छोटा पडदा गाजवणारे दोन कलाकार पहिल्यांदाच एकत्र रंगमंचावर पाहायला मिळणार आहेत. अभिनेता अक्षय मुडावदकर व अभिनेत्री अक्षया नाईक ही नवी जोड़ी या नाटकच्या निमित्ताने पहिल्यांदाच एकत्र आली आहे. बऱ्याच दिवसांपासून एका नाटकाच्या प्रोमोने सर्वाचं लक्ष वेधून घेतलं होत. आता या नाटकात कोणते कलाकार झळकणार आणि नाटकाचे नाव समोर आले आहे. अभिनेत्री अक्षया नाईकचा या नाटकातील लुक काही दिवसांपूर्वी सोशल मीडियावरून प्रदर्शित करण्यात आला होता. (Akshay Mudawadkar New Drama)
अक्षयाच्या या लुकला रसिकांचा उत्तम प्रतिसाद ही मिळाला. आता या नाटकातील अभिनेता अक्षय मुडावदकरचा लुक प्रेक्षकांच्या भेटीस आला आहे. तसेच नाटकाचे नाव अद्याप गुलदस्त्यात ठेवण्यात आले होते नाटकाचे नाव जाहिर केल्यामुळे या नाटकाची उत्सुकता कमालीची वाढली आहे. येत्या ऑक्टोबर महिन्यात हे नाटक रसिक प्रेक्षकांच्या भेटीला येणार आहे.
आणखी वाचा – ‘सुंदरा मनामध्ये भरली’ फेम अक्षया नाईकची रंगभूमीवर दमदार एन्ट्री, नव्या लूकने वेधलं लक्ष
नाटकाची निर्मिती भूमिका ‘थिएटर्स आणि वाईड अँगल एन्टरटेन्मेंट’ यांच्या संयुक्त विद्यमानाने करण्यात आली आहे. केतकी प्रवीण कमळे यांनी निर्मिती केलेल्या ‘चुकभूल द्यावी घ्यावी’ नाटकाचं दिग्दर्शन महेश डोकंफोडे यांनी केलं आहे. संदेश बेंद्रे यांनी नेपथ्य, अशोक पत्की यांनी संगीत, शीतल तळपदे यांनी प्रकाशयोजना, अक्षय मुडावदकर आणि अभिषेक करंगुटकर यांनी गीतलेखन,नेहा मुडावदकर यांनी वेशभूषा, संदीप नगरकर यांनी रंगभूषेची जबाबदारी निभावली आहे. तर अक्षय मुडावदकर, अक्षया नाईक यांच्यासह महेश डोकंफोडे, अमृता तोडरमल यांच्याही नाटकात भूमिका आहेत.
पंचवीस वर्षांपूर्वी रंगभूमीवर आलेल्या ‘चूकभूल द्यावी घ्यावी’ या नाटकाला प्रेक्षकांचा भरभरून प्रतिसाद लाभला होता. अतिशय हलकंफुलकं मनोरंजक असलेल्या नाटकाचं खूप कौतुक झालं. जुनं ते सोनं या म्हणीनुसार प्रेक्षकांना पुन्हा एकदा तोच मनोरंजक अनुभव नव्या रुपात देण्यासाठी या नाटकाची पुनर्निर्मिती करण्यात आली आहे. कसदार लेखनाला उत्तम अभिनयाची साथ असल्यानं हे नाटक रसिकांचं नक्कीच पुरेपुर मनोरंजन करेल यात शंका नाही.