अनेक खेळाडू, राजकारणी, कलाकार किंवा समाजात घडलेली एखादी महत्वाची घटना याबाबत माहिती पसरवण्यास चित्रपट या माध्यमाचा प्रकर्षाने वापर केला जातो. मनोरंजन विश्वात अनेक कलाकार, खेळाडू यांचे बायोपिक प्रेक्षकांच्या भेटीला आले आहेत. सध्या असाच एका खेळाडूच्या आयुष्यावर येणाऱ्या आगामी बायोपिकची चर्चा सर्वत्र रंगली आहे. ऑलम्पिक फुटबॉल स्पर्धेत पहिल्यांदा भारताला स्थान मिळवून देणारे भारतीय फुटबॉल कोच सैय्यद अब्दुल रहीम यांच्या आयुष्यावर आधारित ‘मैदान’ या चित्रपटाची निर्मिती करण्यात आली आहे. या चित्रपटाचा ट्रेलर देखील नुकताच लाँच करण्यात आला आहे. (Maidaan Trailer)
कोच रहीम यांनी शिक्षकाची नोकरी करत असताना फुटबॉलवरच्या प्रेमापोटी या खेळात उतरण्याचे ठरवले. पुढे या क्षेत्रात मजबुतीने पाऊल टाकल्यानंतर रहीम यांनी भारताची सगळ्यात मजबूत फुटबॉल टीम तयार करण्याचे ठरवले आणि त्यांनी अशी एक टीम तयारही केली. रहीम आणि त्यांच्या या संघाच्या संघर्षाची कथा रुपेरी पडद्यावर मांडण्यात येणार आहे. ‘मैदान’ या चित्रपटात दिग्दर्शक, निर्मात्यांनी ही संघर्ष गाथा मांडण्याचे धाडस करत या चित्रपटासाठी तगडी स्टारकास्ट देखील निवडली आहे.
‘मैदान’ या चित्रपटात कोच रहीम यांची भूमिका बॉलीवूडमध्ये दमदार भूमिका निभावणारा अभिनेता अजय देवगण याने साकारली आहे. ट्रेलर मधील अजय देवगणच्या लुक आणि अभिनयाचं सर्वत्र जोरदार चर्चा रंगली आहे. ट्रेलरमधील अजय देवगणच्या करारी संवादांनी अंगावर शहारे येतात. तसेच भारताला पदक मिळवून देणाऱ्या खेळाडूंचा अभिनय देखील रोमांचकारी वाटतो. भारतात फुटबॉल या खेळामधील राजकारण, टीम बांधणी करताना रहीम यांच्या वाटेत आलेल्या अडचणी यावर देखील प्रकर्षाने भाष्य करण्यात आले आहे. या चित्रपटाच्या निर्मितीची धुरा प्रसिद्ध निर्माते बोनी कपूर यांनी सांभाळली असून चित्रपटाचे दिग्दर्शन अमित शर्मा यांनी केले आहे. (Maidaan Trailer)
भारताला आशियाई स्पर्धेत पोहचवणाऱ्या रहीम यांच्या व्यक्तिगत आयुष्याबाबत ही माहिती या चित्रपटातून प्रेक्षकपर्यंत पोहचवण्यात येणार आहे. ‘मैदान’ या चित्रपटात अजय देवगणसह अभिनेते बोमन इराणी, जॉनी लिवर, गजराव राव यांसह अनेक नवीन कलाकार देखील महत्वाच्या भूमिकेत पाहायला मिळणार आहेत. या चित्रपटात अभिनेत्री प्रियामणी, कीर्ती सुरेश या देखील महत्वाच्या भूमिकेत पाहायला मिळणार आहेत. येत्या ‘ईद’ ला हा चित्रपट प्रेक्षकांच्या भेटीला येणार आहे.