सध्या मनोरंजन विश्वात ऐतिहासिक चित्रपटांची निर्मिती होत आहे. मराठीत अनेक ऐतिहासिक चित्रपटांची निर्मिती होत आहे आणि प्रेक्षकांकडूनही या चित्रपटांना मोठ्या प्रमाणात प्रतिसाद मिळतानाचे पाहायला मिळत आहे. अशातच बॉलिवूडलाही ऐतिहासिक चित्रपटांची भुरळ पडली आहे. त्यामुळे येत्या काळात अनेक बॉलिवूड कलाकार महापुरुषांच्या भूमिका साकारताना आपल्याला पाहायला मिळणार आहे आणि यासाठी अनेक चाहते मंडळी उत्सुक आहे.
मध्यंतरी महेश मांजरेकर यांच्या आगामी ‘वेडात मराठे वीर दौडले सात’ या चित्रपटातील अक्षय कुमारचा छत्रपती शिवाजी महाराजांच्या भूमिकेतील लुक चांगलाच व्हायरल झाला होता. याबरोबरच ‘सॅम बहादुर’सारख्या ताकदीच्या भूमिका पेलणारा विकी कौशलही लवकरच लक्ष्मण उतेकर यांच्या आगामी ‘छावा’ या चित्रपटात झळकणार आहे. या चित्रपटात विकी कौशल छत्रपती संभाजी महाराज यांची भूमिका साकारणार आहे. अशातच आता यात आणखी एका अभिनेत्याची भर पडली आहे आणितो अभिनेता म्हणजे शाहिद कपूर.
‘पिंकव्हीला’च्या वृत्तानुसार ‘ओह माय गॉड २’चे दिग्दर्शक अमित राय हे लवकरच छत्रपती शिवाजी महाराज यांच्यावर एक भव्य चित्रपट घेऊन येणार आहेत आणि या चित्रपटात त्यांनी छत्रपती शिवाजी महाराज यांच्या भूमिकेसाठी शाहीद कपूरची निवड केली असल्याची शक्यता वर्तवली जात आहे. अद्याप चित्रपटाच्या घोषणेबद्दल कोणतीही माहिती समोर आलेली नाही. पण लवकरच या चित्रपटाची घोषणा होण्याची शक्यता आहे. त्यामुळे या भव्य चित्रपटाची सगळेच आतुरतेने वाट बघत आहेत.
दरम्यान, ‘तेरी बातों में ऐसा उलझा जिया’हा शाहिदचा आगामी चित्रपट लवकरच प्रेक्षकांच्या भेटीला येणार आहे. या चित्रपटात शाहिदबरोबर अभिनेत्री क्रिती सेनॉनही आहे. येत्या ९ फेब्रुवारी रोजी हा चित्रपट प्रदर्शित होणार आहे. त्यामुळे या चित्रपटासाठी व शाहीदच्या आगामी ऐतिहासिक भूमिकेसाठीदेखील चाहत्यांमध्ये कमालीची उत्सुकता पाहायला मिळत आहे.