International Flight Cancelled : अमेरिका-इस्त्राईल यांच्या इराणवरील संयुक्त हल्ल्यानंतर संघर्ष अधिक तीव्र झाला आहे. या युद्धजन्य परिस्थितीचा आंतरराष्ट्रीय हवाई मार्गावरही मोठा परिणाम झाला आहे. सुरक्षेच्या दृष्टिकोनातून आखाती देशांतील विमानसेवा रद्द करण्यात आली आहे. आणि यांत अनेक भारतीय अडकले आहेत. या युद्धजन्य परिस्थितीत अभिनेत्री विशाखा सुभेदारचा लेक अभिनय सुभेदारही अडकला आहे. कुवेतमध्ये विशाखा सुभेदार यांचा मुलगा अभिनय अडकला असून त्यांनी सोशल मीडियावर व्हिडीओ शेअर करत सरकारकडे धाव घेतली होती. यावर आता महाराष्ट्राचे उपमुख्यमंत्री एकनाथ शिंदे यांनी प्रतिक्रिया दिली आहे.
‘एबीपी माझा’सोबत साधलेल्या संवादात एकनाथ शिंदे म्हणाले की, “विशाखा सुभेदार यांचा मुलगा कुवेतमध्ये आहे, तीन-चार दिवसांपासून. लंडनला जात होता. परंतु ही सर्व युद्धजन्य परिस्थिती सुरु झाली आणि त्यामुळे तो कुवेतला अडकलेला आहे. आमचे डॉक्टर राहुल, त्यांच्यासोबत बोलले आहेत. जोपर्यंत त्यांना इकडे आणण्याची व्यवस्था होत नाही, आणि तीसुद्धा आम्ही करतोय. तोपर्यंत त्यांची तिकडे सुरक्षित राहण्याची व्यवस्था आणि त्यांची कोणतीही गैरसोय होणार नाही, याची काळजी आम्ही घेतोय”.
विशाखा सुभेदार सोशल मीडियावर व्हिडीओ शेअर करत म्हटलं होतं की, “नमस्कार. मी विशाखा सुभेदार. माझी महाराष्ट्राचे मुख्यमंत्री देवेंद्र फडणवीस आणि देशाचे पंतप्रधान नरेंद्र मोदीजी यांना विनंती आहे. माझा मुलगा लंडनच्या प्रवासाला निघाला होता. मात्र कुवेतमध्ये lay over असल्यामुळे त्याचं फ्लाईट तिथे उतरवण्यात आलं. गेले चार दिवस एअर स्पेस नसल्याने सगळ्या देशाला माहित आहे विमानं रद्द करण्यात आली आहे. माझा मुलगा चार दिवसांपासून कुवेतमध्ये अडकला आहे. आता तिथली परिस्थिती गंभीर होत चालली आहे, हे आपण बातम्यांमधून पाहतोय”.
आणखी वाचा – घटस्फोटादरम्यान लेकानेही सोडली बापाची साथ, थलापति विजयचे विवाहबाह्य संबंध खटकले, पत्नीचे गंभीर आरोप
पुढे त्या म्हणाल्या, “तो स्वत: तिथे अनुभवतोय. तिथे हल्ले होत आहेत. एअरलाईनने आत्ता त्यांची हॉटेलमध्ये व्यवस्था केली आहे. इंडियन अँबेसीने व्यवस्था केली आहे. पण आता त्यांना भारतात परत आणण्याची व्यवस्था करावी. दुबईच्या लोकांना परत आणलं गेलं तसंच कुवेतमध्येही भारतीय अडकलेत त्यांना परत आणावं. ही माझी कळकळीची विनंती आहे. अनेक पोरांच्या आया, अनेक कुटुंब त्यांची मायदेशी वाट बघत आहे. लवकरात लवकर त्यांना परत आणा, त्यांची काळजी घ्या एवढीच विनंती आहे. कृपया लवकरात लवकर मार्ग काढावा”.
