Veena Jamkar News : सध्या ‘कुर्ला टू वेंगुर्ला’ या चित्रपटाची जोरदार चर्चा सुरु आहे. हा चित्रपट बॉक्स ऑफिसवरही तुफान धुमाकूळ घालत आहे. या चित्रपटात अभिनेत्री वीणा जामकरने साकारलेल्या भूमिकेचं विशेष कौतुक होताना पहायला मिळत आहे. कोकणी जीवनशैलीवर आधारित असलेल्या या सिनेमात वीणाची भूमिका लक्षवेधी ठरली. वीणा अभिनयाबरोबरच सोशल मीडियावरही बऱ्यापैकी सक्रिय असते. नेहमीच ती काही ना शेअर करत चाहत्यांच्या संपर्कात राहत असते. अशातच वीणाने सोशल मीडियावर शेअर केलेल्या एका भावुक पोस्टने साऱ्यांचं लक्ष वेधलं आहे. वीणाने शेअर केलेली ही पोस्ट चित्रपटाचे दिग्दर्शक विजय कलमकर यांच्यासाठी आहे.
वीणाने पोस्ट शेअर करत भावना मांडत असं म्हटलं की, “तुझी मेहनत, अभ्यास, भूमिका, लिडरशीप या पलिकडे आहेत तुझ्यातल्या संवेदना… ज्या लाभतात अर्थातच दुःख -संकटांचा सामना करुनच. आणि या संवेदना जोपासायच्या की प्रवाह – पतीत होऊन सोडून द्यायच्या याची पण निवडच करावी लागते! तू ती केलीस. तू ‘सिनेमा दिग्दर्शक’ म्हणून खास आहेस. दोन्ही पायांना पोलिओ असलेली व्यक्ती सिनेमा दिग्दर्शक कशी बरं होऊ शकते असं मलाही वाटलंच होतं तुझ्याकडे बघून. पण मी वेळोवेळी अनुभवलं ते तुझ्यात नसलेलं मानसिक अपंगत्व, जे आमच्यापैकी बहुतेक जणांकडे थोडं फार आहेच”.
आणखी वाचा – राणी मुखर्जीला अधिक रोख रक्कम तर शाहरुख खानला कमी, राष्ट्रीय पुरस्कारावेळी असं का घडलं?, जाणून घ्या…
पुढे तिने लिहिलं, “कल्पना करुनही समजू शकत नाही इतक्या अवहेलनेला सामोरं जाऊनही तुझ्या चेहऱ्यावर हसू उमलतं. अन्यायग्रस्त माणसाचं रडणं आणि त्या रडण्याचंच भांडवल करणं हे तुझ्याकडून अपेक्षित असलेले गुण तुझ्या आसपासही फिरकत नाहीत. आणि तिथेच तू खूप मोठा होतोस. ‘कुर्ला टू वेंगुर्ला’चं बॉक्स ऑफिस वर कलेक्शन किती यावर तुझं यश ठरत नाही. तू तेव्हाच सगळं जिंकलंस जेव्हा पहिल्यांदा हातातली काठी बाजूला सारून, तू दिग्दर्शकाच्या खुर्चीवर विराजमान झालास. काय वाटलं असेल तेव्हा तुला?”.
आणखी वाचा – 71st national awards : शाहरुख खान आणि रानी मुखर्जीचा पहिला नॅशनल अवॉर्ड, वाचा विजेत्यांची संपूर्ण यादी…
शेवटी तिने कौतुक करत म्हटलं, “लाडक्या, Thank You Very Much. तू तुझ्याच अस्तित्वाला अर्थ दिलास त्यासाठी! नाहीतर माझ्यासारख्या अनेकांनी कुणाकडे पाहिलं असतं? कुठून बळ मिळालं असतं? तू Super Hit है बॉस”.
